Rơkâu pôa Yamada Takio - Kăn teăng mâ Nhuk pê klêi hnoăng cheăng a Việt Nam, châ Kăn xiâm hnê ngăn tơnêi têa pơkâ ăm Mê dai tơrŭm cheăng, pôa Phạm Minh Chính - Ngế pro xiâm hnê ngăn tơnêi têa khĕn kơdeăn ƀă hlối mơnê mâu tuăn pâ vâ ƀă mơ-eăm dêi Kăn teăng mâ tung mơdêk tơrŭm cheăng hên kơvâ cheăng Việt Nam - Nhuk.

Péa pâ tối phiu ro hlo tung pơla hneăng cheăng a Việt Nam dêi Kăn teăng mâ, tơrŭm cheăng pơla Việt Nam - Nhuk mơnhôk rơdêi, tung tŭm tơdroăng ƀă ki khât tung hên kơvâ. Tơdroăng tơrŭm pơla péa tơnêi têa  rế chiâng xiâm mơhno tơdroăng tơrŭm cheăng tơƀrê, pơxúa, ƀă hên tơmeăm ai hlâu tơngah po rơdâ.

Ngế pro xiâm hnê ngăn tơnêi têa pơkâ thế tung la ngiâ, mơhé pro kăn lơ ôh, Kăn teăng mâ pơtối pêi tro hnoăng cheăng tơná, veăng ‘no hnoăng a tơdroăng tơrŭm cheăng pơla Việt Nam - Nhuk tung tâi tâng mâu kơvâ cheăng.