A roh tơdah, Péa pâ tối, Hneăng hôp ai kơnâ kal khât vâ pơtối pêi pro, i nhên hlê plĕng tơdjuôm khu râ kăn xiâm, mâu troăng prôk la ngiâ hnê mơhno pêi cheăng ton xŏn dêi pôa Nguyễn Phú Trọng, Kăn xiâm pơkuâ hnê ngăn Đảng ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ, ki má lối cho tơbleăng tơdjuôm Việt Nam – Sinuâ ‘na tơdroăng pơtối pro trâu hơngế ƀă mơdêk tơrŭm cheăng ton xŏn tâi tâng, mơjiâng pơlê pơla tối dêi pó tơdroăng la ngiâ Việt Nam – Sinuâ ai kơnâ pêi ton xŏn tiô troăng ‘’6 hên tâ’’.

Pôa Phạm Minh Chính, Ngế pro xiâm hnê ngăn tơnêi têa tối nhên, tung hên tơdroăng cheăng kal pêi i nhên hlê plĕng tơdjuôm khu râ kăn xiâm, Tơbleăng tơdjuôm Việt Nam – Sinuâ mê troăng klông cho kơvâ ki mơnhông, chiâng pêi pro ƀă djâ tơdroăng ki mơhno a ngâ, ai kơnâ kal khât vâ tơdjêp troăng pêi ton xŏn péa tơdroăng cheăng kâ, tơdjêp pơla tung tơdroăng cheăng ‘’Péa hâng lông, môi pakĭng’’ dêi Việt Nam ƀă Troăng tơmiât pêi rơkê ‘’Pakĭng ƀă troăng kân” dêi Sinuâ.

Ngế pro xiâm hnê ngăn tơnêi têa pơkâ thế ahdrối, péa pâ tơkŭm mơdêk tơrŭm pêi pro 03 troăng kân rơxế lơtreng tơdjêp Việt Nam – Sinuâ (Lào Cai – Hà Nội - Hải Phòng; Lạng Sơn – Hà Nội; Móng Cái - Hạ Long - Hải Phòng).