Ngế pro xiâm hnê ngăn tơnêi têa tối nhên, Việt Nam nhoăm tơdroăng mơnhông tơrŭm tiô troăng rơhlâ ƀă New Zealand. Tung la ngiâ, Ngế pro xiâm hnê ngăn tơnêi têa pơkâ thế péa pâ mơ-eăm tơbleăng pêi mâu tơdroăng, pêi mâu tơdroăng tơhrâ tơrá mâu kăn xiâm ƀă mâu tơdroăng tơkêa bro, tơdroăng tơrŭm cheăng, vâ mơnhông tơrŭm cheăng  péa tơnêi têa rế xông tơƀrê;  po hên rôh tơpui tơno tơrá mâu kăn xiâm ƀă rêm râ, mơnhông tơrŭm cheăng kâ - tê mơdró, ‘no liăn mơjiâng tơmeăm khoăng a kong têa dêi rơpó, rĕng châ hên kơxô̆ liăn pê lo ing tê mơdró pơla péa pâ châ 3 rơtal dollars tung 2 hơnăm la ngiâ.

Péa pâ vâ môi tuăn pơtối tơrŭm cheăng krá ƀă hbrâ ƀă dêi rơpó a mâu tíu pêi cheăng hên troăng; malối tơrŭm pêi tơƀrê tung pơla Việt Nam xo pêi hnoăng cheăng pro xiâm ngăn tơrŭm cheăng pơla ASEAN - New Zealand (7/2024 - 7/2027). Tơpui tơno ‘na tơdroăng Biển Đông, péa pâ môi tuăn veăng pêi tiô troăng dêi ASEAN ‘na Biển Đông, tơleăng mơnhên tơdroăng tơbriât ƀă luât pro hơniâp lĕm ing tơdroăng pro tiô luât lâp plâi tơnêi, tung mê ai UNCLOS 1982, tơniăn, ôh tá ai tơdroăng klâi, tơniăn a têa kơxĭ  ƀă a troăng tơƀai Biển Đông.