Mơgêi rôh tơpui tơno, pôa Phạm Minh Chính, Ngế pro xiâm hnê ngăn tơnêi têa tối nhên tơrŭm cheăng péa tơnêi têa tá hâi la lâi tơniăn lĕm môi tiah nôkố tung tâi tâng mâu kơvâ cheăng, dế mơnhông tâi ki kơhnâ ƀă ai pơxúa. Hên rôh tơrŭm cheăng kâ pơla péa pâ pơtối châ trâm.

Mơnhên tối khât mâu rơkong tơpui tối a rôh tơpui tơno, Ngế pro xiâm hnê ngăn tơnêi têa ăm ‘nâi đi đo rơhêng vâ tơmâng, nhuô̆m mâu tơdroăng veăng kum tơdrăng ƀă hbrâ rơnáu tơpui tơno ‘na mâu tơdroăng pâ thế, pơkâ mơ’no, tơmiât rơkê tơrŭm cheăng ai pơxúa dêi mâu grup pơkuâ, khu mơdró kâ ‘no Hàn Quốc, tung mê, ai hên grup pơkuâ, khu mơdró kâ hiăng ‘no liăn cheăng a Việt Nam.

Ngế pro xiâm hnê ngăn tơnêi têa phiu ro, mơnê ƀă rơhêng vâ mâu grup pơkuâ xiâm Hàn Quốc pơtối po rơdâ ‘no liăn, tơrŭm cheăng ƀă Việt Nam, rơtế ƀă dêi rơpó mơdêk mâu tơdroăng ki lĕm tung tơrŭm cheăng nếo, tung tơdroăng ki châ pơxúa tung lâp plâi tơnêi, tŭm têk, tâi tâng kuăn pơlê, tơmiât troh tơdroăng vâ pêi châ kơxô̆ liăn châ xo ing tê mơdró pơla péa pâ 100 rơtal liăn a hơnăm 2025 ƀă 150 rơtal dollars a hơnăm 2030.