A hneăng hôp, Ngế pro xiâm hnê ngăn tơnêi têa tối rơdêi, kơvâ hngêi tơleăng thế tơmâng pơtối mơdêk pêi pro pơhlêh xúa kŏng ngê̆ - ngăn kố cho môi tung mâu tơmeăm ki kal má môi, tŏng kum má môi, châ tơƀrê má môi tung mâu tơdroăng pêi cheăng dêi kơvâ Hngêi tơleăng kuăn pơlê tung mê pơkâ kơvâ hngêi tơleăng pơtối mơnhông ó rơdêi hiâm mơno ‘’5 mơdêk’’.

‘Na hnoăng cheăng, troăng pêi ki xiâm tung la ngiâ, Ngế pro xiâm hnê ngăn tơnêi têa pơkâ, kơvâ Hngêi tơleăng tơkŭm kêi đeăng troăng pơkâ pêi, troăng hơlâ vâ mơdêk pơhlêh xúa kŏng ngê̆ tung kơvâ Hngêi tơleăng kuăn pơlê, mơjiâng Hngêi tơleăng điê̆n tưh. Rĕng tơbleăng Kuô̆k hô̆i tơbleăng ăm pêi pro Luât Khu tơrŭm hngêi tơleăng kuăn pơlê ‘mâi rơnêu ƀă Khu luât xăm tối xivil (‘mâi rơnêu), mơjiâng tơdroăng ki kal apoăng vâ mâu tơdroăng xăm tối mơ’no tơdrêng tung um tiô troăng măng; pơkâ ‘na tơdroăng ki vâ mơnhên điên tưh; xiâm kối khoa hok ƀă tơdroăng ‘na luât dêi tơdroăng vâ vêh pro mơnhên điê̆n tưh, tơdroăng cheăng, hnoăng cheăng dêi ngế ai hnoăng xiâm vâ tơkŭm xăm tối điê̆n tưh.