Hneăng hôp WEF Đại Liên 2024 veăng amê ai 1.600 kăn teăng mâ. Pôa Phạm Minh Chính, Ngế pro xiâm hnê ngăn Chin phuh cho môi tung hên Ngế ối a ko Chin phuh châ WEF ƀă Khu ki tơkŭm po cho Sinuâ krếo veăng Hneăng hôp tung péa hơnăm pơtối. Tơdroăng ki mê mơhno WEF ƀă Sinuâ nhuô̆m khât tíu cheăng, hnoăng cheăng ƀă veăng kum dêi Việt Nam ăm tơtêk cheăng kâ lâp plâi tơnêi xuân môi tiah troăng tơmiât pêi la ngiâ dêi Việt Nam ƀă tơdroăng cheăng kâ tung la ngiâ.

A hneăng hôp, Ngế pro xiâm hnê ngăn Chin phuh tiô tối hdrối kô ai tơdroăng pêi pro, đi đo, tŭm péa pâ ƀă hên troăng. Ki rơhêng vâ tối hơnăm kố, roh apoăng Ngế pro xiâm hnê ngăn Chin phuh kô ai môi ƀai xông tơpui ki rơhêng vâ tối a Roh pơxiâm po tâi tâng rơtế pôa Lý Cường, Ngế pro xiâm hnê ngăn kong têa Sinuâ ƀă mâu khu râ kăn pơkuâ mâu kong têa. Pakĭng mê, Ngế pro xiâm hnê ngăn Chin phuh kô xông tơpui a mâu roh tơpui tơno a Hneăng hôp, pơkuâ mâu roh tơpui, tơno tơnêng ƀă mâu khu tê mơdró ăm krê kô Việt Nam.