Xông tơpui a chôu phut trâm mâ mê, teăng mâ Khu Kăn xiâm pơkuâ hnê ngăn Đảng, Tơnêi têa, pôa Phạm Minh Chính, Ngế pro xiâm hnê ngăn tơnêi têa hiăng mơnê, hâk kơdeăn ƀă rơkâu hâk mâu tơdroăng ki hiăng pêi pro ki rơkê, veăng kum kal kân khât ki mâu vâi krâ pơlê, kăn pơlê, ngê̆ nhân, mơngế ki châ loi nhoăm tung lâp tơnêi têa tối tơdjuôm ƀă mâu vâi krâ ki ai mâ a roh trâm mâ hâi kố tối krê xêh ki hiăng ‘no dêi hnoăng cheăng ki kân, ki rơkê, vâ veăng pêi pro tung mâu khế hơnăm hdrối mê hía nah.

Ngế pro xiâm hnê ngăn tơnêi têa tối nhên, túa lĕm tro cho tơmeăm khoăng ki lĕm kơnía, ki tơtro khât, ki hiăng châ rah xo cho tơmeăm ki kơnâ, ki xiâm rêi má môi dêi hdroâng mơngế, dêi pơlê pơla, dêi rêm ngế. Tuá lĕm tro cho ai tơdjuôm tá tơdroăng ki tiô tuăn mơno dêi hdroâng mơngế, cho khoa hok, ƀă tơdroăng ki mơhno tung pơlê pơla tơdjuôm lâp tơnêi têa. Tuá lĕm tro mê, kal athế châ ngăn, châ hlo, châ xúa, châ pêi pro ƀối, ing mê, mơjiâng chiâng tơdroăng ki phiu ro, pơtroh ăm tơdroăng ki nếo ăm rêm ngế kuăn pơlê. La ngiâ kố ah, Ngế pro xiâm hnê ngăn tơnêi têa pơkâ thế Khu xiâm ngăn ‘na túa lĕm tro, Tơ’noăng Ivá ƀă Ôm hyô ƀă mâu Kơvâ cheăng xiâm, khu râ, kơ koan, kong pơlê, pơlê kong kân; kal tơtrŏng ngăn khât hnoăng cheăng hnê mơjiâng, hnê mơhno khôi túa lĕm tro tiô vâi krâ hiăng hnê djâ, chôu ‘măn ăm sap ing rơxông vâi krâ mê hía nah troh a chal nếo nôkố.