Rơtế ƀă troăng hơlâ tiâ mơnhên, tơmâng xo mâu rơkong tơpui tối dêi kuăn pơlê ‘na mâu kơvâ cheăng kâ rêh ối pơlê pơla, pơkâ tơleăng tơdroăng ki ăm mung liăn xo laih hên ki hên kuăn pơlê pâ thế. Tung mê, ai tơdroăng ki kuăn pơlê mung 270 rơtuh liăn la hngêi tơleăng pơklât thế mơdrếo ăm ngế ki ăm mung lối 4 rơtal liăn ƀă ngế ki mung cho Kơ Să Ka Thêm.

Tơpui a rôh trâm mâ kuăn pơlê pôa Phan Đình Trạc, Ngế cheăng tung Khu xiâm kal kí, kăn pơkuâ ngăn tíu xiâm Đảng, ngế xiâm pơkuâ tơdroăng cheăng tơnêi têa tối tiah kố, mâu rơkong pâ thế dêi kuăn pơlê gá tơtro khât. Tơdroăng ki ăm mung liăn xo laih hên a cheăm, tơring tối tơdjuôm ƀă jâ Kơ Să Ka Thêm tối krê, pôa Phan Đình Trạc pơkâ thế kơ koan ki ai tơdjâk troh kong pơlê Lâm Đồng athế séa ngăn, Hngêi tơleăng kong pơlê Lâm Đồng athế séa ngăn tơdroăng kố hlo môi tiah cho tơdroăng pro xôi há lơ ôh.