Teăng mâ Kăn xiâm pơkuâ hnê ngăn Đảng, Tơnêi têa, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng diâp pơkâ pôk pôa Hồ Đức Anh, Kiểm sát viên Viê̆n séá arak luât kuăn pơlê xiâm, ngế xiâm pơkuâ pêi pro hnoăng tơbleăng ƀă séa ngăn tơdroăng cheăng kâ, pro kăn phŏ pơkuâ Viê̆n séa arak luât xiâm kuăn pơlê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa xuân pơkâ thế pôa Hồ Đức Anh kal mơ-eăm rơtế ƀă tâi tâng kăn pơkuâ Viê̆n arak luât xiâm kuăn pơlê hơ’lêh nếo mâu hnoăng cheăng, tŏng gum tơrŭm Đảng krúa lĕm, rơdêi, mơjiâng kơvâ séa ngăn kuăn pơlê krá rơdêi, tŭm têk ƀă mơjiâng khu kăn ƀô̆, kong chưk, viên chưk tơdrăng, séa ngăn kơtăng, têm rơpiât môi tiah Pôa Hồ hiăng hnê. Tơdrêng amê hlối loi tiah kố pôa Hồ Đức Anh pơtối mơ-eăm pêi klêi rơkê hnoăng cheăng châ pơcháu.