A rôh pêi cheăng, kăn pơkuâ mâu khu xiâm, kơvâ cheăng Tơnêi têa hiăng tơpui tối leăng mâu tơdroăng ki ai hlâu, ki rơdêi, klêi kơ’nâi hiăng pêi pro klêi dêi kong pơlê Trà Vinh, tơdrêng amê hlối mơhno mâu tơdroăng ki tá hâi pêi klêi, pêi pro ối ’ro, pro pá ăm tơdroăng mơnhông dêi kong pơlê môi tiah hngêi trăng, troăng klông, túa pơkâ pro kơno tuk ƀă túa pơkâ pro on tơhrik khía.

Tơpui mơgêi rôh pêi cheăng, pôa Tô Lâm, Kăn xiâm hnê ngăn tơnêi têa mơnhên tối khât mâu tơdroăng ki hiăng kong pơlê Trà Vinh hiăng pêi klêi tung pơla hdrối nah. Tung mê, tơdroăng cheăng kâ hơ’lêh kơhnâ, ki rơdêi mơdêk cheăng kâ rêh ối pơlê pơla apoăng châ lối 10%, hên malối cho kơpong Tơbăng kroăng Cửu Long ƀă ối má 6 tung lâp tơnêi têa. Malối, tung mơjiâng thôn pơlê nếo, Trà Vinh ai 85/85 to cheăm châ plah thôn pơlê nếo.

Kăn xiâm hnê ngăn tơnêi têa rơhêng vâ Chin phuh, Ngế pro xiâm hnê ngăn Chin phuh, mâu khu xiâm kơvâ cheăng kal tơmâng ngăn tŏng gum, rĕng tŏng gum mâu tơdroăng ki pá puât, tơvâ tơvân pro tơ’lêi hlâu má môi ăm kong pơlê Trà Vinh mơnhông tâ nếo tung hneăng ki nếo.