Tối tơbleăng a rôh pêi cheăng, pôa Tô Lâm tối tung tơdroăng tơplâ, mơdât kâ kơluâ, mơdât pro tơdroăng ôh tá tro, Kơvâ cheăng Séa ngăn arak Luât  hiăng hbrâ rơnáu pêi kơtăng mâu tơdroăng rơtế ƀă mâu khu râ pơkuâ cheăng, vâ pêi tơƀrê tung mâu tơdroăng rĕng châ ‘nâi ƀă teăm pơxâu phâk mâu ngế kâ kơluâ, pro ôh tá tro.

Kơvâ cheăng ối tơrŭm krá ƀă mâu kơ koan ngăn ‘na tơdroăng săm phoăng  rĕng tăng ngăn tơleăng mơnhên mâu tơdroăng, malối cho mâu tơdroăng xôi kâ kơluâ, kâ kơhveăm kế tơmeăm, xua tơná pro kăn, hên tơdroăng tơvâ tơvân,  cho hnoăng cheăng pêi dêi Khu hnê mơhno xiâm tơnêi têa pêi ‘na tơdroăng hbrâ mơdât kâ kơluâ, pro ôh tá tro,  séa ngăn hnê mơhno, ai mâu tơdroăng xôi ki ‘nâ pá tăng ‘nâi tá tơmeăm khoăng, hâi ‘nâi xiâm ki vâ nhên; hlối vâ răk tơniăn tung tơleăng mơnhên vâ pơxâu phak kơtăng mơngế ki pro xôi, hlối tơniăn tro tiô luât.

‘Nâi hnoăng cheăng veăng ‘no dêi Kơvâ cheăng Séa ngăn arak Luât kuăn pơlê tung tơdroăng pêi pro ƀă mơnhông tơƀrê, Kăn xiâm hnê ngăn tơnêi têa loi khât, tung la ngiâ, kơvâ cheăng Séa ngăn kô pơtối ai mâu tơdroăng pêi tơƀrê tâ, tŭm tâ, hnoăng veăng ‘no ki kal pêi klêi tơdroăng Pơkâ hneăng Hôp kân rôh má 13 dêi Đảng, pêi tiô pơkâ ‘mâi hơ’lêh mâu Luât ƀă mơjiâng, pê klêi  hnoăng cheăng Tơnêi têa tro tiô Luât xah hô̆i chuh ngiah Việt Nam tung rơxông nôkố.