Tiô rơkong krếo thế dêi pôa Nguyễn Phú Trọng - Kăn xiâm pơkuâ hnê ngăn Đảng, pôa Vladimir Putin - Kăn xiâm pơkuâ kong têa Rusi lăm pôu râ kăn xiâm tơnêi têa Việt Nam. Kơhâi dế lơ 20/6, Leh tơdah pôa Vladimir Putin - Kăn xiâm pơkuâ kong têa Rusi po kân krip a Tíu pêi cheăng dêi kăn xiâm hnê ngăn tơnêi têa, pôa Tô Lâm Kăn xiâm pơkuâ ngăn tơnêi têa pin pơkuâ leh tơdah. Klêi leh tơdah, pôa Tô Lâm - Kăn xiâm hnê ngăn tơnêi têa prế pôa Vladimir Putin - Kăn xiâm pơkuâ kong têa Rusi pơkuâ djâ khu kăn xiâm péa tơnêi têa hôp tơpui tơno.

Hơnăm 2024 Việt Nam ƀă Rusi leh tơbâ 30 hơnăm kĭ tơhrâ tơrŭm cheăng ‘na mâu tơdroăng tơrŭm tung tŭm tơdroăng. Hơnăm 2025 xuân cho môi hơnăm ki pơxúa kân drêng Việt Nam ƀă Rusi tơbâ 75 hơnăm mơjiâng tơrŭm cheăng tơpui kâ. Kố cho rôh ki kal vâ péa tơnêi têa rơtế ƀă dêi rơpó tơbâ mâu tơdroăng cheăng, pơ-eăng hnoăng tơrŭm cheăng tung tơdroăng ton nah. Pakĭng mê, mơjiâng tơdroăng cheăng ƀă tơdjêp, mơnhông tơƀrê tung la ngiâ.

Rôh pôa Putin kăn xiâm pơkuâ kong têa Rusi lăm pôu drêng kố hdró môi tơdroăng tơpui kâ ki kal dêi péa tơnêi têa, veăng ‘no hnoăng ki kal tâ nếo tung tơdroăng tơrŭm tung tŭm tơdroăng cheăng pea tơnêi têa, veăng ‘no hnoăng hơniâp lĕm, tơrŭm ƀă mơnhông a kơpong ƀă tung lâp plâi tơnêi.