Hâi lơ 11/6, a Hà Nội,  Đảng ủy Kŏng an Xiâm, Khu xiâm Kŏng an tơkŭm po hneăng hôp pơcháu hnoăng cheăng pêi pro Ngế xiâm pơkuâ ngăn Khu xiâm kŏng an pơla Đăi tươ̆ng Tô Lâm, Ngế cheăng tung Khu xiâm kal kí, Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam ƀă Thươ̆ng thươ̆ng Lương Tam Quang, Ngế cheăng tung tíu xiâm Đảng, Ngế xiâm pơkuâ Khu xiâm Kŏng an.

Tơbleăng a rôh hôp,  pôa Tô Lâm Kăn xiâm hnê ngăn tơnêi têa rơkâu Thươ̆ng tươ̆ng Lương Tam Quang hiăng châ pôk pêi hnoăng cheăng pro Ngế xiâm pơkua Khu xiâm kŏng an; tối tơdroăng kố mơhno loi nhoăm, tơmâng khât dêi Đảng, Tơnêi têa ƀă Kuăn pơlê ƀă mâu lêng Kŏng an kuăn pơlê, tơmâng xo, khĕn kơdeăn mâu hnoăng veăng ‘no, hnoăng pêi cheăng dêi Thươ̆ng thươ̆ng Lương Tam Quang tung kơvâ cheăng châ pơcháu tung mâu hơnăm hdrối mê hía nah.

Vâ pơtối rak vế mâu hnoăng cheăng pêi hiăng châ tơƀrê, pê klêi tơdroăng pơcháu kring gak tơniăn tơnêi têa, rak tơniăn pơlê pơla, pôa Tô Lâm Kăn xiâm hnê ngăn tơnêi têa pơkâ thế tung la ngiâ, mâu lêng Kŏng an kuăn pơlê pơtối pê klêi tơƀrê mâu tơdroăng pơkâ, tơdroăng hnê mơhno dêi Đảng, Tơnêi têa ‘na kring gak tơniăn pơlê pơla. Klêi leh pơcháu hnoăng cheăng, Ngế xiâm Lương Tam Quang kô thâ hnê mơhno mâu tơdroăng kring tơniăn tơnêi têa, rak tơniăn pơlê pơla ƀă mơjiâng Khu lêng kŏng an kuăn pơlê, pơtối pê klêi mâu tơdroăng tơmiât rơkê, mâu tơdroăng hnê mơhno, mâu tơdroăng cheăng ki Kăn xiâm hnê ngăn tơnêi têa dế pơkuâ hnê mơhno, ƀă tơdroăng pê klêi mâu pơkâ dêi Đảng.