A rôh tơdah, pôa Tô Lâm, Kăn xiâm hnê ngăn tơnêi têa tối, Đảng, Tơnêi têa ƀă kuăn pơlê Việt Nam ngăn nhoăm tơrŭm cheăng tiah hmâ, malối cho vâi pú, hlối cho nhŏng o ƀă Cuba; tối sôk ro drêng tơdroăng tơrŭm cheăng pơla péa tơnêi têa ôh tá la lâi pơtê ƀă ai hên tơdroăng mơnhông tơƀrê, tung tŭm tơdroăng tung pơla lâp plâi tơnêi trâm tơdroăng pá. Vâ pơtối mơdêk tơrŭm cheăng tung tŭm tơdroăng pơla Việt Nam ƀă Cuba, pôa Tô Lâm, Kăn xiâm hnê ngăn tơnêi têa pơkâ thế péa pâ pơtối rak to a kơlo tơpui tơno tơrá mâu kăn, trâm mâ mâu kăn xiâm; tơrŭm krá, tơbleăng pêi tơbrê mâu tơdroăng tơhrâ râ kăn, mâu luât pơkâ trâu ƀă ki khât tâ.

Tối mâu tơdroăng tơrŭm cheăng pơla péa pâ, Kăn xiâm hnê ngăn tơnêi têa púi vâ péa pâ tơbleăng pêi tơbrê mâu tơdroăng tơrŭm cheăng mơnhông ‘na chiâk deăng, mơdêk tơrŭm cheăng kâ - tê mơdró - ‘no liăn cheăng péa pâ, xuân môi tiah po rơdâ tâ nếo mâu tơdroăng cheăng ki ê ki rêm pâ ai  tơmeăm pêi vâ mơnhông tơƀrê.