Pôa Tô Lâm, Kăn xiâm hnê ngăn tơnêi têa mơnhên Việt Nam đi đo nhuô̆m tơrŭm cheăng nhŏng o tiô khôi vâi krâ nah ƀă tơrŭm hên tơdroăng ƀă Belarus hiăng châ Khu râ kăn pơkuâ ƀă kuăn pơlê péa tơnêi têa tơbêng ing rơxông Liên Xô xuân môi tiah châ pơtối mơdêk tung lối 30 hơnăm hiăng hluâ sap ing péa tơnêi têa mơjiâng tơrŭm cheăng tơpui kâ ƀă kong têa ê hơnăm 1992.

Klêi mê, mơnhên Việt Nam đi đo ngăn Belarus cho ngế pú hmâ, khu tơrŭm ki loi tơngah, nhuô̆m tơdroăng tŏng kum dêi kuăn pơlê Belarus hiăng ăm Việt Nam hdrối nah, khŏm pơtối thăm tơrŭm hên tơdroăng cheăng ƀă Belarus. Tơpui tơno ‘na tơrŭm cheăng a mâu khu tơrŭm cheăng lâp plâi tơnêi ƀă hôp tơpui tơno hên troăng, pôa Tô Lâm, Kăn xiâm hnê ngăn tơnêi têa ƀă Kăn teăng mâ Belarus môi tuăn péa tơnêi têa kô pơtối tơrŭm ƀă tŏng kum dêi pó a mâu hôp tơpui tơno lâp plâi tơnêi ƀă kơpong, môi tiah Khu lâp kong têa, Khu tơrŭm Cheăng kâ châu Á – Âu xua pơxúa tơdjuôm dêi péa tơnêi têa, veăng kum tung mơjiâng hơniâp lĕm, tơniăn ƀă mơnhông a kơpong ƀă lâp plâi tơnêi.