A chôu phut koh tơdah mê, pôa Tô Lâm hiăng phiu ro roh apoăng châ trâm mâu kăn teăng mâ Khu tơrŭm châu Âu, drêng pôa hiăng to pro Kăn xiâm hnê ngăn; mơnê mâu rơkong rơkâu lĕm tro dêi khu kăn pơkuâ râ xiâm dêi châu Âu ƀă mâu kong têa ki ối tung Khu. Pôa Tô Lâm vêh mơnhên tối, châu Âu ƀă mâu kong têa tung Khu cho mâu kong têa ki tơrŭm kal kân khât dêi Việt Nam; pói rơhêng vâ mâu kăn teăng mâ kô đi đo cho tíu ki tơdjêp ki kal, veăng gum hên tâ nếo tung tơdroăng thăm mơdêk tơrŭm cheăng nhŏng o, veăng gum mơnhông tơrŭm cheăng pơla Việt Nam ƀă châu Âu mơnhông tâk a kơlo ki a’ngêi tâ.

Pôa Tô Lâm xuân hiăng pâ thế mâu kăn teăng mâ pơtối mơdêk tung tơrŭm tơpui tơno pơla mâu khu râ ƀă ai rơkong tơpui thăm mơdêk mâu kong têa châu Âu ki tá hâi teăm châ kĭ Tơdroăng tơkêa pêi Kring vế mơ’no liăn cheăng pơla Việt Nam ƀă châu Âu, rĕng kĭ pro xêt Tơdroăng Tơkêa pro ƀă Vi ƀan hnê ngăn châu Âu rĕng tah lôi theh trĭng ki phak mơdât, dó inâi IUU ƀă tơdroăng ki mơ’no tê ká xi xŏng dêi Việt Nam, gum ăm Việt Nam mơnhông pêi cheăng kâ, tăng tơnăng ká xi xŏng a têa kơxĭ, păn rak ká xi xŏng ki tơniăn.