Kăn xiâm hnê ngăn tơnêi têa tối, Việt Nam đi đo ngăn Rusi cho môi tung mâu kong têa tơrŭm ƀă ki má môi tung luât pơkâ tơpui kâ dêi tơná, đi đo séa ngăn tơmâng vâ ’nâi plĕng mâu tơdroăng ƀă môi tuăn ƀă Rusi mơnhông tơniăn krá. Đảng, Tơnêi têa ƀă kuăn pơlê Việt Nam đi đo chôu pâ tơdroăng veăng kum kân kĭn ki kuăn pơlê Liên Xô ƀă kuăn pơlê Rusi hiăng kum Việt Nam tung rơxông tơplâ tơbriât pro tơleăng lĕm, lâp tơnêi têa tơrŭm chiâng a hneăng hdrối nah, xuân môi tiah tung tơdroăng pơhlêh nếo, mơjiâng ƀă kring vế tơnêi têa nôkố.

Pôa Tô Lâm, Kăn xiâm hnê ngăn tơnêi têa khĕn kơdeăn tơdroăng mơnhông tơƀrê tung tơrŭm cheăng sap nah ƀă Tơrŭm tung tŭm tơdroăng pơla Việt Nam ƀă Rusi tung mâu hơnăm hdrối mê hía nah tá tâi tâng rêm kơvâ cheăng ƀă mâu tơdroăng cheăng, phiu ro hlo tơdroăng tê mơdró pơla péa pâ tung hơnăm hdrối tâk hên.

Péa pâ xuân ối hên tơmeăm khoăng ai hlâu vâ tơrŭm cheăng ƀă, malối tung mâu kơvâ cheăng kâ - tê mơdró - ‘no liăn cheăng, mơjiâng tơmeăm khoăng, troăng prôk rơxế kơtâu, ôm hyô, trâm tơpui tơno ƀă kuăn pơlê.