Kăn xiâm hnê ngăn tơnêi têa mơnhên, Việt Nam ngăn mơnhông tơrŭm nhŏng o, tơrŭm ƀă kong têa Sinuâ cho tơdroăng rah xo troăng pêi cheăng ton xŏn, kơjo má môi tung tâi tâng troăng tơpui kâ ƀă kong têa ê tơniăn krê, pơkuâ xêh, hên troăng tơpui kâ ƀă kong têa ê dêi Việt Nam.

‘Na troăng pêi la ngiâ, hnoăng cheăng la ngiâ, Kăn xiâm hnê ngăn tơnêi têa pói vâ péa pâ tơrŭm krá tơniăn tung mâu tơdroăng ki xiâm: rak trâm mâ tơpui tơno, trâm mâ khu râ kăn xiâm ƀă mâu râ, pêi pro châ tơƀrê mâu troăng tơrŭm cheăng; mơdêk ƀă pro châ tơƀrê tơrŭm păng ‘nâng tung mâu kơvâ cheăng, mơdêk tơdjêp troăng rơxế lơtreng tơkâ hluâ tơkăng kong ƀă tơrŭm mơjiâng mâu troăng rơxế lơtreng tro tiô pơkâ a mâu kong pơlê peăng kơnhŏng Việt Nam; pơkâ thế Sinuâ pơtối lôu péa kơchơ mơdró ăm tơmeăm pêi lo ing chiâk deăng, ká xi xŏng, plâi kâ, hơ’nêh í, peâp dêi Việt Nam. Tơmiêt troh hdró ki kal hơnăm 2025, klăng roh leh tơbâ 75 hơnăm mơjiâng tơrŭm tơpui kâ Việt Nam – Sinuâ, pôa Tô Lâm, Kăn xiâm hnê ngăn tơnêi têa pơkâ thế péa pâ mơ-eăm mơdêk, djâ tơrŭm cheăng pơla péa pâ to a râ a’ngêi, rế hía rế păng ‘nâng, châ tơƀrê tâ.