Pôa Tô Lâm, Kăn xiâm hnê ngăn tơnêi têa rơkâu pôa Kohdayar Marri châ pôk pro Kăn teăng mâ Pakistan a Việt Nam. Kăn xiâm hnê ngăn tơnêi têa tối nhên, Việt Nam ngăn nhoăm ƀă Pakistan, môi kong têa ki kal a kơpong Ấn Độ Dương - Thái Bình Dương; loi Pakistan kô ai mâu hnoăng veăng ‘no ki kal ăm tơdroăng tơrŭm hơniâp, tơniăn tung kơpong. Tơdah pôa Ilundi Dos Santos, kăn teăng mâ Mozambique, pôa Tô Lâm, Kăn xiâm hnê ngăn tơnêi têa tối, Việt Nam đi đo nhoăm ƀă púi vâ mơnhông tâ nếo tơrŭm cheăng tiah hmâ sap nah ƀă Mozambique, môi tung mâu kong têa tơrŭm cheăng ki má môi dêi Việt Nam a châu Phi.

Tơdah pôa João Pereira, Kăn teăng mâ Timor Leste, pôa Tô Lâm Kăn xiâm hnê ngăn tơnêi têa ăm ‘nâi, mơhé tơmeăm tơdroăng cheăng kâ tê mơdró pơla péa pâ oh tá hên, la tơdroăng tơrŭm cheăng pơla péa pâ ối kân, tung mê, ai tơrŭm pêi chiâk, hyôh phôn, hnê hriâm, têa châu têa kơxăng ƀă hên ki ê Kăn xiâm hnê ngăn tơnêi têa pơkâ thế Kăn teăng mâ tung hneăng dêi tơná tơrŭm tro ƀă mâu khu xiâm, kơvâ cheăng, tíu pêi cheăng dêi Việt Nam mơdêk tơrŭm tâ nếo pơla péa tơnêi têa.