Pôa Sinlavong Khoutphaythoune, Kăn xiâm hnê ngăn Măt trâ̆n Lếo mơjiâng tơnêi têa tối phiu ro ƀă hâk tơngăm troh koh hmât kơ pôa Tô Lâm, Kăn xiâm hnê ngăn tơnêi têa. Pôa Sinlavong Khoutphaythoune tối nhên kô pơtối tơrŭm krá ƀă Tíu xiâm Măt trâ̆n tơnêi têa Việt Nam ƀă tơmâng, veăng kum, pro tơ’lêi hlâu ăm mơngế Việt Nam pêi cheăng kâ, rêh ối a Lếo.

Pôa Tô Lâm rơkâu mâu hnoăng hiăng châ pêi pro ki kân ki Đảng, Tơnêi têa ƀă kuăn pơlê Lếo tối tơdjuôm ƀă Tíu xiâm Măt trâ̆n Lếo mơjiâng tơnêi têa tối krê hiăng châ pêi pro tung mâu hơnăm hdrối mê hía nah; loi khât hnoăng pơkuâ rơkê dêi Đảng Nhân yân Kăch  măng Lếo, mâu kăn Lếo kô pê klêi mơjiâng tơnêi têa Lếo hơniâp ro kro mơdrŏng.

Xuân tung mâu hâi lơ 11/7, pôa Tô Lâm, Kăn xiâm hnê ngăn tơnêi têa hiăng tơdah pôa Boviengkham Vongdala, Kăn xiâm hnê ngăn  Tơrŭm cheăng Việt Nam - Lếo ƀă mâu kăn tung khu kăn xiâm tơrŭm cheăng. Kăn xiâm hnê ngăn tơnêi têa xuân pơkâ thế Hneăng hôp Tơrŭm cheăng pơla Lếo - Việt Nam pơtối tơrŭm ƀă mâu kơ koan khu râ pơkuâ cheăng dêi Lếo tơmâng veăng kum, pro tơ’lêi hlâu ăm kuăn ‘nĕng Việt Nam a kong têa ê, tung mê, ai Kuăn pơlê mơngế Việt Nam ki cheăng kâ rêh ối a kong têa Lếo, kơhnâ veăng mơnhông kong têa Lếo rế ton rê kro mơdrŏng.