Mâu hơnăm hdrối mê hía nah, Đảng ủy Kŏng an xiâm tơnêi têa, Kăn xiâm ngăn Khu xiâm kŏng an malối tơmâng khât troh tơdroăng cheăng rak ngăn vâi hdrêng, mơjiâng rơpŏng hngêi kăn ƀô̆ mâu lêng Kŏng an hơniâp ro, krá tơniăn. Troh nôkố, ai lối 3 rơpâu ngế vâi hdrêng kuăn tê kơtiê xơpá châ Kŏng an mâu tíu pêi cheăng, kong pơlê xo păn roăng, veăng kum.

Tâi tâng mâu kuăn ki châ veăng kum, mâu kuăn dêi mâu kăn ƀô̆, mâu lêng Kŏng an hriâm tâp, rơnêu pât vâ pêi pro tơdroăng ki lĕm, kơhnâ nguăn loi, loi nhoăm kơ jâ pôa, nôu pâ. Tối tơbleăng a rôh trâm mâ, pôa Tô Lâm Kăn xiâm hnê ngăn tơnêi têa pơkâ thế mâu kăn ƀô̆, kơvâ cheăng, mâu râ kăn rêm râ tơkŭm tơbleăng pêi kơtăng, tơbrê mâu troăng rơhlâ dêi Đảng, luât tơnêi têa ‘na rak ngăn, hnê hriâm, kring vế vâi hdrêng ƀă mâu tơdroăng pơkâ nhên, mê cho “Tâi tâng pơlê pơla kring vế vâi hdrêng,  mơhé la lâi xuân thế kring vế tơmâng tŏng kum vâi hdrêng’’.