Tơbâ 70 hơnăm hâi mơjiâng dêi Khu mố đô̆i hơnăm hiăng krâ Đại đoàn 305 Tơdúa paraxut-Đăk Kŏng, Kăn xiâm hnê ngăn tơnêi têa rơhêng vâ Khu tối tơbleăng Khu Mố đô̆i hơnăm hiăng krâ Đại đoàn 305 Tơdúa paraxut-Đăk Kŏng tung la ngiâ pơtối rak vế um méa ki lĕm dêi “Mố đô̆i Pôa Hồ”, kơhnâ veăng mơjiâng tơdroăng kal kí kong pơlê tơniăn, krá rơdêi, mơjiâng pơlê cheăm kro mơdrŏng lĕm.

Drêng kố, Kăn xiâm hnê ngăn tơnêi têa pơkâ thế Khu xiâm pơkuâ ngăn lêng, Khu xiâm ngăn Mố đô̆i tro rong ƀă rêh ối pơlê ƀă Khu ngăn  Mố đô̆i hơnăm hiăng krâ Việt Nam pơtối tơmâng ngăn pơkuâ, hnê mơhno ƀă bro tơ’lêi hlâu kum mâu Mố đô̆i hơnăm hiăng krâ Đại đoàn 205 Tơdúa paraxut-Đăk Kŏng pơtối ai mâu tơdroăng cheăng tŏng gum dêi rơpó kơdroh kơtiê, pêi cheăng kâ rơkê, veăng gum mơnhông cheăng kâ rêh ối pơlê pơla dêi kong pơlê; mơdêk khôi hmâ “Pâ troh mâu ngế ai hnoăng”, pêi hnoăng cheăng pâ mơnê chiâng túa ki lĕm dêi xah hô̆i Việt Nam.