Tơpui a rôh leh, pôa Tô Lâm, Kăn xiâm hnê ngăn tơnêi têa tối phiu ro châ vêh pôu tơnêi tơníu kăch măng ki châ ô eăng Pắc Bó hmâ tro ƀă Pôa Hồ, tro ƀă tơdroăng ton nah kăch măng dêi Đảng, Tơnêi têa; tơdrêng amê hlối châ hlo ƀă mâ mâu tơdroăng ki pơhlêh tung tơdroăng rêh ối dêi kuăn pơlê a tíu kố, châ hlo mâu kế tơmeăm, mâu tơdroăng tơkêa pro ki kal dêi kong pơlê hiăng pro pơxúa tơƀrê, veăng kum mơdêk tơdroăng rêh ối liăn ngân hiâm mơno dêi vâi krâ nhŏng o a kong pơlê.

Kăn xiâm hnê ngăn tơnêi têa mơnhên tối khât tơring Hà Quảng mâu hơnăm hdrối hiăng tơkŭm mơnhông cheăng kâ rêh ối pơlê pơla, rak vế tơniăn tơdroăng cheăng lêng ƀă gâk kring, la xuân ối rak vế mơdêk tơdroăng rêh ối ăm kuăn pơlê. Kăn xiâm hnê ngăn tơnêi têa tối nhên, dế ối rêh nah, Pôa Hồ pâ nhuô̆m đi đo tơtrŏng troh hnoăng cheăng rak ngăn ăm mâu rơxông hơnăm ối nếo, malối cho mâu vâi muăn phô̆m vâ xông kân, vâi hdrêng ƀă hên ki ê ƀă kố xuân cho hnoăng cheăng ki Đảng ƀă Tơnêi têa đi đo tơmâng vâ tâi tâng mâu vâi hdrêng pơrá châ troh hngêi trung, châ xúa pơxúa ing mâu tơdroăng cheăng kăch măng. Xua mê, tơdroăng ki mơdêk rơkê hnê hriâm, hnê cheăng pêi cho tơdroăng ki kal, tung mê kal tơmâng ngăn ing mâu râ mầm non.