Pôa Tô Lâm, kăn xiâm hnê ngăn tơnêi têa veăng ai mâ ƀă tơpui hnê mơhno a rôh leh. Teăng mâ kăn pơkuâ Đảng, Tơnêi têa, pôa Tô Lâm kăn xiâm hnê ngăn tơnêi têa khĕn kơdeăn mâu tơdroăng ki pêi pro tơƀrê, ivá mơ-eăm, tơdroăng ki hbrâ rơnáu xêh, kơhnâ veăng dêi khu pơkuâ ngăn Đảng pơlê kong kân, khu kăn pơkuâ, khu kŏng an ƀă mâu kơ koan, khu râ, kơvâ cheăng, rêm râ Pơlê kong kân Hồ Chí Minh tung tơrŭm pêi pro Luât ƀă hbrâ rơnáu tro ăm tơdroăng ki mơjiâng khu lêng veăng gâk kring, rak tơniăn a Pơlê kong kân Hồ Chí Minh ƀă tung lâp tơnêi têa hiăng păng ‘nâng châ mơjiâng ƀă pê cheăng ing nôkố.

Kăn xiâm hnê ngăn tơnêi têa loi, ƀă khôi hmâ khên tơnôu ƀă tơdroăng pêi pro tơƀrê hiăng pêi tung pơla hdrối nah, hơnăm 2024 ƀă mâu hơnăm ki pơtối, khu râ Đảng, khu kăn pơkuâ ƀă kuăn pơlê Pơlê kong kân Hồ Chí Minh kô pêi klêi mâu tơdroăng pơkâ mơ’no. Khu ki veăng rak vế gâk kring, rak tơniăn a pơlê kong kân kô mơdêk hnoăng cheăng tŏng kum khu Kŏng an ƀă khu ki ai tơdjâk troh rak vế gâk kring tơniăn, veăng kum mơjiâng, mơnhông pơlê kong kân rế hía rế tơniăn, kro mơdrŏng, rơkê, tơrŭm xua tơdroăng ki tơniăn, hơniâp ro dêi kuăn pơlê.