Tơdah Kăn teăng mâ kong têa Sri Lanka, pôa Tô Lâm loi tơngah ƀă túa ki rơkê tơtro dêi môi ngế tơpui kâ ƀă kong têa ê ki rơkê ƀă hlê plĕng ‘na kơpong, Kăn teăng mâ ai hên veăng tơlo păng ‘nâng ăm tơdroăng mơdêk tơrŭm cheăng Việt Nam – Sri Lanka mơnhông lĕm.

Môi tuăn ƀă mâu tơdroăng mơnhên troăng pêi la ngiâ mơnhông tơrŭm péa tơnêi têa tung la ngiâ dêi Kăn teăng mâ, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối kal tơkŭm mơdêk thăm loi tơngah kal kí; mâu tơdroăng tơpui tơno khu ƀă trâm mâ khu râ kăn xiâm ƀă mâu râ.

Rơtế hâi ki mê, tơdah 14 ngế Kăn teăng mâ pôu râng hnoăng cheăng troh tơbleăng mơ-éa ki kal, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pói vâ mâu Kăn teăng mâ tung hneăng pêi cheăng kô pêi lĕm tro hnoăng cheăng ‘’tơdjêp’’ nhŏng o ƀă tơrŭm cheăng, tơbêng ƀă mơnhông tâ mê nếo tơrŭm cheăng pơla Việt Nam ƀă mâu kong têa ki mâu kăn teăng mâ; tơdrêng amê mơnhên, Việt Nam kô pro tơ’lêi hlâu vâ mâu kăn teăng mâ pêi kêi đeăng hnoăng cheăng.