Pôa Tô Lâm tơpui tơno, mơhno tối honiâp ro, sôk suâ drêng hlo ki mơnhông ai pơxúa kân khât dêi tơrŭm cheăng nhŏng o pơla Việt Nam ƀă Lếo, vêh mơnhên, Việt Nam đi đo veăng vâ môi tuăn kân ó khât tung hneăng mơjiâng, mơnhông tơnêi têa Lếo. Pôa Tô Lâm mơnhên tối, kơdeăn khĕn tơdroăng tơrŭm krá kâk pơla péa Ƀơrô xiâm dêi 2 Đảng tung pơkâ pêi pro châ tơƀrê mâu tơdroăng kĭ tơkêa tơrŭm, tối tơbleăng ăm dêi pó tơdroăng ki nếo, ki rơkê plĕng tung hnoăng cheăng veăng hnê tối, ki malối, hbrâ ăm hneăng Hôp kân Đảng, mơjiâng tơdroăng pêi cheăng dêi Khu xiâm kal kí, Khu xiâm pơkuâ hnê ngăn.

Pôa Tô Lâm pâ thế péa pâ pơtối tơrŭm cheăng lĕm tro tâ nếo mâu tơdroăng ki hiăng vâ môi tuăn, veăng gum thăm mơdêk ki tơƀrê, ai pơxúa tung cheăng hnê tối, tơbleăng khĕn, gum ăm khu kăn xiâm pơkuâ hnê ngăn Đảng tung hneăng mơnhông nếo.