Ngế pro xiâm phŏ hnê ngăn tơnêi têa tối nhên mâu troăng rơhlâ khĕn kơdeăn vâ tơniăn pơkâ séa ngăn liăn ôh tá ai yă drêng tơbleăng ‘mâi hơ’lêh liăn khế sap hâi lơ 1/7 kố ah. ‘Na tơdroăng ki “ôh tá tơniăn nôkố” Ngế pro xiâm phŏ hnê ngăn tơnêi têa tối nhên tơdroăng kal pro tơniăn; pêi ahdrối cho tơbleăng luât pơkâ tŏng kum pơlê pơla, mơnhông tơdroăng rêh ối dêi kuăn pơlê, ‘mâi hơ’lêh tơdroăng ôh tá tơniăn trếo pơtôu.

Tối mơgêi kơ-êng ƀă tiâ a rôh hôp má 7, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, hiăng ai 162 ngế kăn kơ-êng ƀă 31 rôh ngế kăn tơpui tơno. Klêi kơ-êng ƀă tiâ ăm hlo, mâu tơdroăng kơ-êng  hiăng tiâ tro tiô tơdroăng kơ-êng vâ ‘nâi, “tro’’ ƀă “ ‘ló” mâu tơdroăng ki kuăn pơlê lâp tơnêi têa ƀă mâu Kăn kuô̆k hô̆i vâ ‘nâi.