Tiô rơkong krếo thế dêi Chin phuh Kŏng hòa Cuba, pôa Trần Lưu Quang, Ngế pro xiâm phŏ hnê ngăn tơnêi têa pơxiâm lăm pôu tơrŭm tơroâ păng ‘nâng Cuba ing hâi lơ 14 – 19/4. Kơxê lơ 15/4, pôa Trần Lưu Quang, Ngế pro xiâm phŏ hnê ngăn tơnêi têa hiăng ai rôh tơpui tơno ƀă pôa Ricardo Cabrisas - Ngế pro xiâm hnê ngăn má môi hlối cho ngế xiâm ngăn tê mơdró ƀă ‘no liăn cheăng kong têa ê Cuba.

Teăng mâ Chin phuh ƀă kuăn pơlê Việt Nam, Ngế pro xiâm phŏ hnê ngăn tơnêi têa tối mơnê khât tơdroăng ki tŏng kum hiâm mơno tơrŭm tơroâ dêi pôa Fidel Castro, kăn pơkuâ, mâu rơxông kăn pơkuâ ƀă kuăn pơlê Cuba kơ Việt Nam tung hnoăng cheăng tơleăng lĕm hdroâng mơngế, mơjiâng ƀă rak vế Tơnêi têa.

Ngế pro xiâm phŏ hnê ngăn tơnêi têa tối rơdêi Chin phuh Việt Nam khŏm mơ-eăm tơbleăng mâu tơdroăng tơkêa tŏng kum Cuba thăm mơdêk pêi chiâk deăng tung hiâm mơno cho ngế pú tơrŭm tơroâ, nhŏng o, tơƀrê, ai pơxúa. Tơdrêng amê hlối tối nhên ki kal dêi khu mơdró kâ ƀă kuăn pơlê péa tơnêi têa tung tơbleăng, mơdêk tơƀrê mâu tơdroăng tơkêa tơrŭm pơla péa pâ; pơkâ thế Chin phuh Cuba tơmâng ngăn tŏng kum, pro tơ’lêi hlâu vâ khu mơdró kâ Việt Nam ‘no liăn cheăng ƀlêi chiâng a Cuba.

Péa Ngế pro xiâm hnê ngăn tơnêi têa môi tuăn pơtối tơrŭm tung tơbleăng mâu tơkêa khu râ kăn xiâm hiăng châ rơhéa, mơdêk ki tơƀrê tâ nếo troăng tŏng kum Vi ƀan Chin phuh vâ mơdêk mâu tơdroăng tơkêa tơrŭm ki kal, tăng troăng tŏng kum khu mơdró kâ Việt Nam ‘no liăn cheăng a Cuba, veăng kum tung tơrŭm cheăng pơla péa tơnêi têa.