Tơpui a rôh hôp, pôa Đỗ Tiến Sỹ, Kăn xiâm pơkuâ Rơ’jíu Việt Nam tối nhên, tung pơla mơjiâng VOV, cho kơ koan um tơvi ki xiâm dêi tơnêi têa, ƀă 7 to ƀâng tơpui mơ’no, 17 to ƀâng um tơvi, Hlá tơbeăng in ƀă Hlá tơbeăng điê̆n tưh, Rơ’jíu Việt Nam cho kơ koan tơbleăng tơdroăng kal kí hên ƀâng ƀă hên mâu hlá tơbeăng tung tơdroăng mâu ƀâng kơxô̆.

A rôh hôp, pôa Trần Lưu Quang, Ngế pro xiâm phŏ hnê ngăn Chin phuh tối nhên, Tơbâ 99 hơnăm Hâi hlá tơbeăng kăch măng Việt Nam cho tơdroăng ki kal pơxúa dêi mâu ngế ki cheăng ‘na chêh hlá tơbeăng, xua mê athế ai hnoăng cheăng pôu râng mơjiâng ƀă mơnhông ivá hlá tơbeăng kăch măng.

Tiô Túa pơkâ Hlá tơbeăng, hlá tơbeăng dế tung pơla pơplêh, kal mâu hvêa chêng prôk ki kơchăng. Pakĭng hnoăng cheăng ing peăng Chin phuh, mâu kơ koan, hlá tơbeăng athế tơkâ luâ mâu tơdroăng xơpá. Rơkâu mâu kơ koan chêh hlá tơbeăng um tơvi, rơ’jíu đi đo ai hiâm mơno krúa, tuăn ngoâ rơkê, ai hên ivá vâ pơtối hnoăng cheăng ki ai hên xơpá ‘na ngiâ.