Rôh hôp hiăng tơbleăng Pơkâ dêi Ngế pro xiâm hnê ngăn Chin phuh kĭ pơkâ kơpong Tây Nguyên hơnăm 2021 – 2030, tơdroăng vâ pêi troh a hơnăm 2050. Tiah mê, pơla hơnăm 2021 – 2030 kơpong Tây Nguyên pơkâ tơdroăng ki mơdêk tâi tâng kế tơmeăm châ 7 – 7,5%; kơxô̆ liăn pêi lo rêm ngế dâng 130 rơtuh liăn.

Rôh hôp xuân hiăng mơgêi lối 1 hơnăm pêi pro Pơkâ 23 dêi Khu xiâm pơkuâ tơdroăng kal kí ƀă tơdroăng pêi pro dêi Chin phuh ‘na mơnhông cheăng kâ rêh ối pơlê pơla, rak vế tơniăn tơdroăng cheăng lêng gâk kring kơpong Tây Nguyên. Mơgêi rôh hôp, pôa Trần Lưu Quang, Ngế pro xiâm phŏ hnê ngăn Chin phuh tối tah kố, tung pơla hdrối nah ‘na cheăng kâ, rêh ối pơlê pơla kơpong Tây Nguyên hiăng hơ’lêh khât. Mâu kong pơlê ai ivá mơnhông tung la ngâ ƀă 3 tơdroăng ki chiâng vâ pêi tơdrêng hlối. Mê cho troăng prôk tơdjêp. Má péa, cho mơjiâng kơphô̆ ôm hyô tiô tơdroăng, tiô tour la tơtrŏng rêm kơpong ôm hyô athế ai túa ki lĕm tro krê. Má pái, chiâng vâ tối dêi rơpó tung tơdroăng ki tơ’mot ‘no liăn cheăng tung tơnêi têa ƀă kong têa ê.