Kơxo hâi lơ 19/7, a pơlê kong kơdrâm Quy Nhơn, kong pơlê Bình Định, pôa Trần Quang Phương, Ngế pro xiâm phŏ hnê ngăn Kuô̆k hô̆i pơkuâ Hôp tơmâng xo tơdroăng veăng hnê ‘na Luât ‘mâi hơ’lêh, tơ’nôm mâu tơdroăng dêi Luât pêi cheăng séa ngăn dêi Kuô̆k hô̆i ƀă Hô̆i đong hnê ngăn Kuăn pơlê. Veăng Hôp ai Ngế teăng mâ Hô̆i đong dêi 10 to kong pơlê, pơlê kong kơdrâm kơpong Tơdế tơnêi têa, Tây Nguyên ƀă Kăn hnê ngăn Hô̆i đong mâu tơring, pơlê kong krâm, pơlê kong kơdrâm dêi kong pơlê Bình Định.

Kơ’nâi 8 hơnăm pêi pro tro tiô Luât pêi cheăng séa ngăn dêi Kuô̆k hô̆i ƀă Hô̆i đong hnê ngăn, tơdroăng séa ngăn dêi Kuô̆k hô̆i, Hô̆i đong hnê ngăn rế mơnhông tơƀrê, pê klêi hên tơdroăng kal, châ kuăn pơlê khĕn kơdeăn.

A rôh Hôp, mâu kăn xuân mơhno tối mâu tơdroăng pêi pro hâi teăm tro, tơvâ tơvân dêi Luât tung pơla pêi mâu tơdroăng séa ngăn dêi Kuô̆k hô̆i ƀă Hô̆i đong hnê ngăn kuăn pơlê hơnăm 2015 ƀă pâ thế hlối tối thế pêi klêi mâu tơdroăng tung hlá mơ-éa Luât ‘mâi hơ’lêh, tơ’nôm mâu tơdroăng dêi Luât pêi cheăng séa ngăn dêi Kuô̆k hô̆i ƀă Hô̆i đong hnê ngăn Kuăn pơlê.

Tơbleăng a hneăng hôp, pôa Trần Quang Phương ăm ‘nâi, Hôp tơpui tơno hiăng tơmâng xo hên tơdroăng hnê khĕn dêi mâu kăn Hô̆i đong hnê ngăn mâu kong pơlê. Pôa Trần Quang Phương - Kăn xiâm hnê ngăn Kuô̆k hô̆i pơkâ thế, tung tơdroăng pơkâ thế ‘mâi rơnêu Luât thế tơmiât hdrối troh mâu tơdroăng ki tơvâ tơvân; tơdroăng ‘na mơngế, tơdroăng pêi pro, túa pêi cheăng hnê tối mơ-eăm dêi kăn teăng mâ Hô̆i đong hnê ngăn mâu kong pơlê ƀă ki tơdjâk dêi luât thế tro tiô pơkâ.