A rôh leh, poa Trần Thanh Mẫn, Kăn pơkuâ hnê ngăn Đảng đoàn Kuô̆k hô̆i, Kăn xiâm hnê ngăn Kuô̆k hô̆i hiăng diâp Kơlŏng 65 hơnăm ối tung Đảng ăm pôa Nguyễn Văn An, Kăn xiâm hnê ngăn Kuô̆k hô̆i hneăng hdrối. Tơpui a rôh leh, Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, tung pơla mơjiâng ƀă mơnhông tơnêi têa, Đảng hiăng pơkuâ kăch măng Việt Nam tơkâ luâ mâu tơdroăng pá puât, pơloăng mơnúa, pêi châ tơƀrê hên mâu tơdroăng ki kal rế hía rế xêt.

Tơƀrê, châ kuăn pơlê tơmâng xo, mơnhên tối. Veăng gum tung tơdroăng ki ƀlê chiâng tơdjuôm mê, ai hnoăng cheăng veăng pleăng, veăng gum dêi mâu rơxông kăn ƀô̆, đảng viên, dêi Đảng ƀô̆ kơ koan Ƀơrô cheăng Kuô̆k hô̆i, malối cho mâu ivá pleăng kân kĭn, ki kal dêi pôa Nguyễn Văn An, Kăn xiâm hnê ngăn Kuô̆k hô̆k hneăng hdrối tung hnoăng cheăng mơjiâng ƀă rak vế Tơnêi têa; ‘măn chôu hên tơdroăng ki rơkê plĕng kơnía, ƀai hriâm tro ki gum Kuô̆k hô̆i mâu hneăng kơ’nâi pơtối châ pơtó, mơdêk.