Pôa Trần Thanh Mẫn, Kăn xiâm hnê ngăn Kuô̆k hô̆i mơnhên tối khât tơdroăng cheăng dêi Hô̆i đong hnê ngăn kong pơlê Thanh Hóa tung pơla hdrối kố nah hiăng ai hên hơ’lêh, tơmiât rơkê, mơdêk ki rơkê tung tơdroăng cheăng tiô troăng rế hía rế pơxúa khât, rơkê, tơƀrê tâ.

Tung la ngiâ ah, Kăn xiâm hnê ngăn Kuô̆k hô̆i pơkâ thế kong pơlê pơtối mơ-eăm ƀă kơtăng tâ tung pơkuâ, hnê mơhno, tơkŭm mâu tơdroăng pêi pro ki mơnhông tơƀrê, mâu hnoăng cheăng ki kal, tŏng gum mâu tơdroăng pá puât, mâu tơdroăng ki tơvâ tơvân, mơdêk ki ai hlâu, ki pơxúa kal dêi kong pơlê tro ƀă mơhnhôk ivá rơdêi dêi tâi tâng kuăn pơlê tung kong pơlê.

Kăn xiâm hnê ngăn Kuô̆k hô̆i pơchân, Thanh Hóa pơtối tơbleăng tơƀrê mâu troăng hơlâ mơnhông pêi chiâk deăng, pêt kong, păn ká xi xŏng, tro ƀă mơjiâng thôn pơlê nếo, tơtrŏng mơnhông pêi chiâk deăng xúa kơmăi kơmok chal nếo, hơ’lêh túa ki pêt mơjiâng kế tơmeăm chiâng pêi lo liăn ngân ing pêi châk deăng.