Pôa Vương Đình Huệ, Kăn xiâm hnê ngăn Kuô̆k hô̆i tối phiu ro drêng troh pôu Thượng Hải, pơlê kong kân bu châ ôh tá 0,1% ƀăng tơnêi dêi Sinuâ la cho pơlê kong kân ki kơdrâm kuăn pơlê má môi, kơxô̆ liăn GDP hên ƀă djâ troăng ahdrối tung hơ’lêh, lôu péa, tơmiât rơkê dêi Sinuâ. Kố xuân cho tíu ki pôa Tập Cận Bình, Kăn xiâm hnê ngăn Đảng pơkâ mơ’no tíu vêh ‘na tơniăn krê kuăn pơlê tung plâ ƀă pêi pro túa pơkâ kố, mâu tíu xiâm đi đo tơtrŏng tơdroăng tơkŭm mâu rơkong tơpui tối dêi hên hĭn rơxông kuăn pơlê tung pơla mơjiâng bro luât.

Veăng ai mâ a rôh tơpui tơno ƀă mâu khu ki rơkê ƀă kuăn pơlê pơlê kong kân ‘na mơjiâng luât, pôa Vương Đình Huệ, Kăn xiâm hnê ngăn Kuô̆k hô̆i tối ki rơkê dêi Việt Nam tung tơdroăng ki xo rơkong tơpui chêh bro luât, đơn pơtroh môi tiah Luât tơnêi tơníu ki ‘mâi hơ’lêh hiăng ai lối 12 rơtuh rơkong tơpui dêi kuăn pơlê.

Kăn xiâm hnê ngăn Kuô̆k hô̆i ăm ‘nâi, kô veăng tăng ‘nâi ki rơkê dêi Sinuâ ƀă tối nhên Kuô̆k hô̆i Việt Nam kô ôh tii ăm mâu rơkong tơpui ki lâi dêi kuăn pơlê, khu mơdró kâ, dêi kăn Kuô̆k hô̆i pơtroh ăm ki ôh tá châ tơdah xo, tơpui tối leăng nhên.