Drêng tơdah pôa Wang Cheng, Kăn pơkuâ Grup pơkuâ TCL,  hnối tối ăm ‘nâi, a Việt Nam, TCL hiăng mơ’no 3 hngêi kơmăi mơjiâng tơmeăm a Bình Dương ƀă Quảng Ninh ƀă tâi tâng kơxô̆ liăn mơ’no lối 100 rơtuh dollars ƀă ivá châ 6 rơtuh tơmeăm/hơnăm. Tung la ngiâ, Grup pơkuâ TCL kô po rơdâ tơdroăng tơkêa bro mot tung tơdroăng mơjiâng tơmeăm ƀă mơjiâng mâu hngêi kơmăi nếo, tơbleăng mâu khu ki pơtroh tơmeăm troh Việt Nam, vâ pêi kêi đeăng tơdroăng pơtroh tơmeăm.

Pôa Vương Đình Huệ, Kăn xiâm hnê ngăn Kuô̆k hô̆i kheăn kơdeăn troăng tơmiât mơjiâng tơdroăng pơtroh tơmeăm dêi TCL a Việt Nam. A roh tơdah, pôa Trương Thiên Nhiệm, Kăn hnê ngăn hlối cho Kăn pơkuâ hnê ngăn Đảng ŭy Grup pơkuâ ƀă mâu khu tơrŭm râ kăn xiâm ki ê dêi Grup pơkuâ Tianneng, Kăn xiâm hnê ngăn Kuô̆k hô̆i phiu ro grup pơkuâ rah xo Việt Nam cho tíu troh mơ’no liăn cheăng; pói vâ tơdroăng tơkêa bro rĕng tung pêi cheăng, veăng kum tung tơdroăng mơnhông dêi kong pơlê xuân môi tiah Việt Nam, thăm tơrŭm cheăng tê mơdró, mơ’no liăn cheăng pơla Việt Nam – Sinuâ.