Kố cho kăn xiâm hnê ngăn dêi Sinuâ ki apoăng ki pôa Vương Đình Huệ, Kăn xiâm hnê ngăn Kuô̆k hô̆i hôp tơpui tung hneăng lăm pôu Sinuâ. Tơdroăng pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ trâm mâ pôa Vương Đình Huệ hâi ki apoăng klêi khu kăn troh a Bắc Kinh mơhno ki nhoăm tơrŭm cheăng pơla péa tơnêi têa ƀă hneăng lăm pôu dêi mâu kăn xiâm Đảng ƀă tơnêi têa Việt Nam.

Péa ngế kăn tối phiu ro hlo ki mơnhông tơƀrê tơrŭm cheăng pơla Việt Nam - Sinuâ, tối nhên kô pơtối mơdêk tơrŭm trâm mâ kuăn pơlê, pơtối rak hneăng cheăng dêi mâu kăn Kuô̆k hô̆i, Kuăn pơlê péa tơnêi têa tung tơdroăng tối mâu tơdroăng, hnê mơhno, môi tuăn pơlê pơla, ing mê, mơdêk tơrŭm pơla péa tơnêi têa tung mâu kơvâ cheăng. Khĕn kơdeăn ƀă tối nhoăm mâu tơdroăng tơrŭm dêi Việt Nâm, dêi pôa Tập Cận Bình - Kăn xiâm hnê ngăn kong têa Sinuâ tối Sinuâ vâ rơtế ƀă Việt Nam pơtối rak tơpui tơno tung tŭm tơdroăng, mơdêk trâm mâ mâu kăn ƀă rêm râ, mơdêk trâm mâ, tơrŭm ƀă hên ƀâng Đảng, tối túa pêi cheăng, tơpui tơno ‘na mơjiâng Đảng ƀă rak ngăn tơnêi têa, mơdêk tơrŭm cheăng, rĕng tơrŭm, hâk mơnê Việt Nam veăng tơrŭm cheăng mơnhông mơdêk kơpong ki kân dêi Sinuâ.