Pôa Vương Hộ Ninh, Kăn xiâm hnê ngăn Chin phuh lâp tơnêi têa Sinuâ phiu ro kơ pôa Vương Đình Huệ, Kăn xiâm hnê ngăn Kuô̆k hô̆i lăm pôu păng ‘nâng Sinuâ rôh apoăng tung hnoăng cheăng nếo. Péa ngế kăn xiâm hnê ngăn môi tuăn pêi pro trâu rơdâ tơrŭm cheăng pơla Măt trâ̆n Tơnêi têa Việt Nam ƀă Chin phuh lâp tơnêi têa Sinuâ, thăm mơdêk tơpui tơno ki rơkê plĕng vâ rơtế mơdêk tro má môi, tơƀrê má môi hnoăng cheăng dêi rêm khu tơrŭm tung tơdroăng kal kí dêi rêm tơnêi têa.

Kăn xiâm hnê ngăn Kuô̆k hô̆i pơkâ thế péa pâ mơdêk tơrŭm tê mơdró mơdêk tiô troăng tơdâng, krá ton; thăm mơêk tơrŭm, tơdjêp tung kơvâ troăng prôk, troăng rơxế lơ treng, mơhnhôk khu mơdró kâ Sinuâ ‘no liăn tung mâu tơdroăng tơkêa kân, dâi, ăm tơdroăng mơnhông dêi Sinuâ; tơkŭm po tro mâu tơdroăng trâm mâ tơrŭm tơroâ, trâm kuăn pơlê môi tiah tơkŭm trâm mâ droh rơtăm, tơkŭm po rôh hôp Kuăn pơlê, trâm mâ pơla mâu khu ki tơrŭm dêi Măt trâ̆n Tơnêi têa Việt Nam ƀă Chin phuh lâp tơnêi têa Sinuâ môi tiah Kong đoân, vâi kơdrâi.

Tung roh lăm pôu pêi cheăng kong têa Sinuâ dêi pôa Vương Đình Huệ, Kăn xiâm hnê ngăn Kuô̆k hô̆i, kơxo hâi lơ 9/4, a Bắc Kinh, Khu pơkuâ tơƀai lâp tơnêi têa Việt Nam (Vietnam Airline) tơkŭm po Leh tơbâ 30 hơnăm troăng kơneăng ƀă koh phiu ro roh kơneăng má 100.000 a troăng kơneăng Việt Nam – Sinuâ. Tung pái chât hơnăm, sap ing po kơneăng troh a kong têa Sinuâ, Vietnam Airlines hiăng pêi pro 100.000 roh kơneăng, pơto lối 11 rơtuh roh tơmối ƀă 166 rơpâu tâ̆n tơmeăm.

Ki tơtrŏng má môi, tơkâ hluâ mâu tơdroăng pá puât dêi Covid – 19, Vietnam Airlines cho môi tung mâu khu pơkuâ tơƀai apoăng tơdjêp troăng kơneăng troh Sinuâ ƀă thăm rak mâu tơdroăng mơhnhôk po ăm tơƀai kơneăng, ôm hyô a kố klêi kơ’nâi pơreăng kân châ mơdât. A tơdroăng kal kố, Vietnam Airlines ƀă khu tơrŭm cheăng dêi Sinuâ hiăng kĭ tơkêa tơrŭm mơdró ƀă thăm tơrŭm, tơrŭm a mâu troăng kơneăng pơla Việt Nam ƀă Sinuâ.