A roh trâm mâ tơpui tơno, Péa ngế kăn pơkuâ kheăn kơdeăn hôm ‘na mâu tơdroăng mơnhông dêi tơrŭm péa Đảng, péa tơnêi têa Việt Nam – Sinuâ tung pơla kố nah, tơpui tơno mâu troăng vâ mơnhông tơmeăm ki ai hlâu, ki rơdêi dêi péa pâ, mơdêk tâ mê nếo tơrŭm cheăng pơla mâu khu xiâm, kong pơlê Việt Nam ƀă kong pơlê Vân Nam tung la ngiâ.

Pôa Vương Đình Huệ, Kăn xiâm hnê ngăn Kuô̆k hô̆i mơnhên troăng hơlâ môi tuăn dêi Đảng, Tơnêi têa Việt Nam ‘na pơtối pêi trâu hơngế ƀă mơdêk râ tơrŭm nhŏng o tiô khôi vâi krâ nah, khu tơrŭm cheăng ton xŏn tâi tâng, pơlê pơla kum dêi pó tung la ngiâ Việt Nam – Sinuâ ai kơnâ troăng pêi cheăng ton xŏn.

Um: Kăn xiâm hnê ngăn Kuô̆k hô̆i trâm mâ Kăn pơkuâ hnê ngăn cheăng Đảng kong pơlê Vân Nam

Kăn xiâm hnê ngăn Kuô̆k hô̆i pói vâ péa pâ tơrŭm krá tơniăn tung pơkuâ, gâk ngăn tơkăng kong tiô 03 mơ-éa ki kal ‘na tơkăng kong a tơnêi ƀă mâu tơdroăng môi tuăn tơdjâk, tơrŭm cheăng tơleăng tơniăn lĕm mâu tơdroăng ki u ối ƀă tơdroăng ki nếo a kơpong tơkăng kong, mơjiâng troăng tơkăng kong hơniâp lĕm, tơniăn.