Tung toăng hngêi tâl nếo mơdâng, jâ H’Náp Niê, hdroâng kuăn ngo Rơđế (a ƀuôn Kplang, cheăm Tân Tiến, tơring Krông Păč, kong pơlê Dak Lak) phiu ro: tâi tâng rơpŏng ai lối 20 ngế mê cho 3 rơxông,  rơpŏng kŭn, pơrá hiăng xĕn ối tíu ối nếo. Rơpŏng jâ ai vâ chê 2.000 met karê tơnêi ối ƀă tơnêi kơdrum ối tung pơkâ pro troăng kân ăm phêp rơxế kơtâu têi. Apoăng, rêm ngế xuân tô tuăn xua kơlo chêl thiê̆n, tŏng kum bu iâ tâng pơchông yă kơchơ. Laga hlo kăn ƀô̆ ing tơring troh cheăm, thôn mơ-eăm pơtâng tối mơhnhôk, jâ H’Náp Niê xuân hlê plĕng ki kal dêi troăng kân ăm phêp rơxế kơtâu têi ƀă tơdroăng mơnhông dêi cheăm, pơlê.

“Vâi krâ kuăn pơlê a pơlê ngin mê ôh tá hlê plĕng hên ‘na troăng kân ăm phêp rơxế kơtâu têi, laga kăn ƀô̆ troh mơhnhôk, pơtâng tối tá hiâm mơno, cho vâ môi tuăn, kuăn pơlê ngin hlo hâk vâ ‘nâng, hlo tơtro xua mê phiu ro xĕn ối tíu ê. Ai to lâi tíu kuăn pơlê ngin xuân tro lŭp iâ, laga xua tơdroăng ki tơdjuôm kuăn pơlê hbrâ veăng ăm. Rơpŏng xĕn ối a kố, mâu kuăn, mâu muăn xuân chôa ‘lâng tơniăn hngêi trăng’’.

Ƀuôn Kplang cho tíu rêh ối ton dêi vâi krâ kuăn pơlê mơngế Rơđế. Jâ H’Biơi Ƀyă, Kăn pơkuâ chi ƀô̆ ƀuôn Kplang, cheăm Tân Tiến, tơring Krông Păč tối ăm ‘nâi, troăng kân ăm phêp rơxế kơtâu têi Khánh Hòa - Ƀuôn Ma Thuôt tơkâ hluâ tung dế pơlê, tơdjâk troh hluâ tơdế kơxô̆ rơpŏng kuăn pơlê. Hên toăng hngêi kân lĕm rơdâ, hên kơdrum loăng plâi kơnâ liăn thế gu tah pro troăng kân. Apoăng tơdroăng pơtâng tối, mơhnhôk vâ kuăn pơlê môi tuăn yă chêl thiê̆n tơnêi ƀă châ mơnhên cho hên pá puât. Laga, tơdroăng pá puât châ chôa ‘lâng tah lôi drêng khu kăn ƀô̆ tơring troh rơtế kăn ƀô̆ cheăm, thôn, rơtế kâ, rơtế ối, rơtế pơtâng tối, mơhnhôk ăm i hlê plĕng, veăng gum ƀă kuăn pơlê. Jâ H’Niơi Ƀyă tối ăm ‘nâi:

“Kơhâi mê kuăn pơlê lăm, bu ai kơxê măng ối a hngêi. Mâu kăn ƀô̆, khu râ kăn pơkuâ tơring hâi ki lâi xuân troh hmâ kơmăng troh ƀă kuăn pơlê, tơpui ƀă nâl Rơđế nếo. Á tơmâng mơhnhôk, pơtâng tối mê vâ môi tuăn, tâng hâk ‘nâng, vâi krâ ki ê xuân tiah mê há.

Pôa Trịnh Minh Tâm, Kăn pơkuâ hnê ngăn Đảng uỷ xuân cho Kăn hnê ngăn Vi ƀan cheăm Tân Tiến, tơring Krông Păč, kong pơlê Dak Lak tối ăm ‘nâi, lâp cheăm ai 241 rơpŏng kuăn pơlê tro tơdjâk drêng pêi pro troăng kân ăm phêp rơxế kơtâu têi Khánh Hòa – Ƀuôn Ma Thuột. Kố cho troăng kân ki kân má môi, tơdjâk troh hên rơpŏng kuăn pơlê má môi, laga châ môi tuăn ƀă tăng tơnêi rĕng má môi.

“Ƀă cheăm, tá khu cheăng kal kí veăng roh pơtâng tối mâu rơpŏng kuăn pơlê vâ vâi ‘nâi troăng hơlâ. Kăn ƀô̆ troh hôp kuăn pơlê, pơtâng tối mơhnhôk kuăn pơlê vâ rĕng pơcháu tơnêi. Troh nôkố 241 rơpŏng kuăn pơlê hiăng pơcháu tơnêi ăm khu ki mơjiâng troăng kân’’.

A ‘’tíu ki pêt hên plâi sầu riêng’’ dêi Dak Lak, tíu ‘’hơtá tơnêi, hơtá mêa’’ môi tiah tơring Krông Păč, tơdroăng tăng tơnêi ƀă tơdroăng pêi pro mâu tơmeăm cho hên tơdroăng. Pro ti lâi vâ châ tơdroăng môi tuăn ing kuăn pơlê, pôa Trần Hồng Tiến, Kăn pơkuâ hnê ngăn Đảng tơring Krông Păč, tối ăm ‘nâi, mê cho tơdroăng khŏm mơ-eăm, kơtăng, khên tơmiât, khên pêi ƀă khên pôu râng hnoăng cheăng dêi khu kăn ƀô̆.

“Pá puât má môi a kố cho mơjiâng tơdroăng ki môi tuăn tung kuăn pơlê, pro ti lâi tăng tơnêi. Krông Păč tro tơdjâk kân ƀă lối 300 ha tơnêi, ki hên cho tơnêi pêi chiâk deăng kơnâ liăn. Ai mâu loăng plâi sầu riêng hơnăm má 5 – 6 cho môi hơnăm kố châ 30 – 40 rơtuh liăn.  Laga tiô yă tơnêi têa mê bu chêl dâng 7 rơtuh liăn tê. Nôkố pro ti lâi vâ kuăn pơlê môi tuăn, xua mê ngin mơjiâng khu hnê mơhno tơring, râ cheăm, mơjiâng mâu tôh pơtâng tối, mơhnhôk’’.

Achê kuăn pơlê, hlê plĕng kuăn pơlê ƀă khên tơmiât, khên pêi, khên pôu râng hnoăng cheăng cho mâu tơdroăng ki tâ hlo nhên a khu kăn ƀô̆, khu kăn pơkuâ, đảng viên a tơring Krông Păč, kong pơlê Dak Lak tung tơdroăng pêi pro tăng tơnêi pro troăng kân ăm phêp rơxế kơtâu têi Khánh Hòa - Ƀuôn Ma Thuột. Kơnôm mê, tơdroăng tơkêa bro hiăng châ tơdroăng môi tuăn dêi kuăn pơlê. Pơkâ dêi Đảng tơtro hiâm mơno kuăn pơlê, tâi tâng kuăn pơlê a mâu pơlê tơring Krông Păč pơrá phiu ro ăm tơnêi vâ Tơnêi têa pro troăng kân ăm phêp rơxế kơtâu têi.