Tơdrốu khế apoăng hơnăm, tâi tâng tơmeăm dêi Dak Nông châ vâ chê 9.600 rơtal liăn, tâk lối 5%, ối má 2 kơpong Tây Nguyên. Xo hnoăng liăn ngân tơnêi têa châ vâ chê 1.500 rơtal liăn. Tung tâi tâng kơxô̆ 3.200 rơtal liăn mơ’no cheăng tơnêi têa hơnăm 2024, troh tâi khế 6, kong pơlê nếo mơ’no liăn châ dâng 27%. Ki rơhêng vâ tối cho kơxô̆ liăn 3 tơdroăng xiâm tơnêi têa tung kong pơlê nôkố xing xoăng ƀă mơ’no liăn ối hrá.

Hô̆i đong kong pơlê Dak Nông mơnhên, ai hên tơdroăng ối ai, ối pá tung mơnhông cheăng kâ – rêh ối pơlê pơla dêi kong pơlê. Tung mê, mâu tơdroăng kreăng,achê hdi xo tơnêi pêi pro pơkâ pêi chiâ xo tơmeăm tung kơdâm tơnêi, ki má lối cho bauxite dế tơdjâk ôh tá lĕm tro troh tơdroăng pêi pro mâu hnoăng cheăng kâ dêi kong pơlê. Kong pơlê Dak Nông riân ai troh lối 1.000 tơdroăng tơkêa bro, tơmeăm tung ƀăng deăng 6.700 ha tro achê hdi tơnêi ƀă pơkâ pêi pro bauxite. Kong pơlê hiăng hên xôh pâ thế troh Tơnêi têa laga troh nôkố xuân tá hâi châ tah lôi.