Khu kăn xiâm pơkuâ hnê ngăn Đảng Kŏng sản Việt Nam, Kuô̆k hô̆i tơnêi têa Kŏng hoa Xah hô̆i chuh ngiah Việt Nam, Kăn xiâm hnê ngăn tơnêi têa Kŏng hoa Xah hô̆i chuh ngiah Việt Nam, Chin phuh tơnêi têa Kŏng hoa Xah hô̆i chuh ngiah Việt Nam, Vi ƀan Xiâm Măt trâ̆n tơnêi têa Kŏng hoa Xah hô̆i chuh ngiah Việt Nam ƀă rơpŏng hngêi mơjo pâ tơtâng tối:

Pôa Nguyễn Phú Trọng - Kăn xiâm pơkuâ hnê ngăn xiâm Đảng, Kăn xiâm hnê ngăn Đảng lêng tơnêi têa, kot mâ hâi lơ 14 khế 4 hơnăm 1944; pơlê xiâm: cheăm Đông Hội, tơring Đông Anh, Pơlê kong kân Hà Nội. Ối a hngêi kơxô̆ 5, kơphô̆ Thiền Quang, bêng Nguyễn Du, pơlê krâm Hai Bà Trưng, Pơlê kong kân Hà Nội.

Pêi cheăng sap hơnăm 1967; mot Đảng Kŏng san Việt Nam hâi lơ 19 khế 12 hơnăm 1967. Ngế cheăng tung Khu kăn Xiâm Đảng mâu hneăng VII, VIII, IX, X, XI, XII, XIII; Ngế cheăng tung khu xiâm kal kí hneăng VIII; Kăn xiâm hnê ngăn Kuô̆k hô̆i tơnêi têa Kŏng hoa Xah hô̆i chuh ngiah Việt Nam hneăng XI, XII; Kăn xiâm pơkuâ hnê ngăn xiâm Đảng Kŏng san Việt Nam mâu hneăng XI, XII, XIII; Kăn xiâm hnê ngăn tơnêi têa Kŏng hoa Xah hô̆i chuh ngiah Việt Nam hneăng hơnăm 2016-2021, Kăn xiâm hnê ngăn Hô̆i đong Lêng ƀă Kring vế tơniăn; Kăn xiâm hnê ngăn Đảng Lêng Xiâm; Vi ƀan pơkuâ cheăng Đảng ủy Kŏng an Xiâm tơnêi têa; Ngế pơkuâ hnê mơhno Tíu xiâm  tơnêi têa ‘na hbrâ, mơdât kâ kơluâ, mơdât pro ôh tá tro. Kăn xiâm hnê ngăn Kuô̆k hô̆i mâu hneăng XI, XII, XIII, XIV, XV.

Klêi to lâi khế tro châi tamo râ, mehé hiăng châ Đảng, Tơnêi têa, mâu yăo sư, ƀok thái pơkeăng ki rơkê mơ-eăm pơlât krâu khât, pôa hiăng  kơtê i hiâm a 13 chôu 38 phút hâi lơ 19 khế 7 hơnăm 2024 (tơkéa vâ tối cho hâi má 14 khế 6 hơnăm Giáp Thìn), a Hngêi pơkeăng Xiâm Lêng 108, Hà Nội, klăng 80 hơnăm.

Vâ chê 60 hơnăm pêi cheăng, pôa hiăng ai hên hnoăng kân, kơnía ƀă tơdroăng cheăng kăch măng ki lĕm dêi Đảng ƀă hdroâng mơngế. Pôa châ Đảng, Tơnêi têa diâp Mê dai Hơlŏng trĭng, Huy hiệu 55 hơnăm cheăng Đảng ƀă hên mâu Mê dai kơnâ ki ê dêi Việt Nam ƀă Lâp plâi tơnêi.

Pôa hlâ cho môi tơdroăng hía kân dêi Đảng, Tơnêi têa, kuăn pơlê ƀă nhŏng o pôa. Vâ mơhno tuăn pâ  kơ pôa Nguyễn Phú Trọng - Kăn xiâm pơkuâ hnê ngăn Đảng, Khu kăn  Xiâm Đảng Kŏng sản Việt Nam, Kuô̆k hô̆i tơnêi têa Kŏng hoa Xah hô̆i chuh ngiah Việt Nam, Kăn xiâm hnê ngăn tơnêi têa Kŏng hoa Xah hô̆i chuh ngiah Việt Nam, Chin phuh tơnêi têa Kŏng hoa Xah hô̆i chuh ngiah Việt Nam, Vi ƀan xiâm Măt trâ̆n Tơnêi têa Việt Nam pơkâ tơkŭm po hneăng mơdâm pôa Nguyễn Phú Trọng - Kăn xiâm pơkuâ hnê ngăn Đảng tiô pơkâ mơdâm ki kân râ Tơnêi têa.

KHU XIÂM PƠKUÂ HNÊ NGĂN ĐẢNG KŎNG SAN VIỆT NAM

KUÔ̆K HÔ̆I TƠNÊI TÊA KŎNG HOA XAH HÔ̆I CHUH NGIAH VIỆT NAM

KĂN XIÂM HNÊ NGĂN TƠNÊI TÊA KŎNG HOA XAH HÔI CHUH NGIAH VIỆT NAM

CHIN PHUH TƠNÊI TÊA KŎNG HOA XAH HÔ̆I CHUH NGIAH VIỆT NAM

VI ɃAN XIÂM MĂT TRÂ̆N TƠNÊI TÊA VIỆT NAM