Veăng hneăng hôp ai lối 300 kăn teăng mâ, teăng mâ mâu khu xiâm, kơvâ cheăng, kơvâ Tơnêi têa, khu râ kăn pơkuâ Khu hnê mơhno tơdroăng pêi cheăng tơpui kâ ƀă kong têa ê 63 kong pơlê, pơlê kong kơdrâm tung tơnêi têa ƀă Khu xiâm pơkuâ Mô đô̆i gâk tơkăng kong mâu kong pơlê tơkăng kong.

Hneăng hôp hiăng mơdoh hên chôu tơbleăng, tơmâng mâu tơdroăng ki nếo Pơkâ kơxô̆ 47 dêi Chin phuh ‘na Tơdroăng pêi pro dêi Chin phuh troh hơnăm 2030, pêi pro Mơgêi dêi Khu xiâm kal kí ‘na pơtối mơdêk ki dâi lĕm, châ tơƀrê tơdroăng tơpui kâ ƀă kong têa ê tung rơxông nếo. Hneăng hôp mơnhên, pêi pro tơtro tơdroăng tơpui kâ ƀă kong têa ê kô kum pú hmâ lâp plâi tơnêi châ achê tơdroăng ‘na Việt Nam tơtro má môi.

Ing mê, hlê plĕng tro ‘na tơnêi têa, kuăn mơngế Việt Nam, gum pêi pro troăng hơlâ tơpui kâ ƀă kong têa ê po rơdâ, hên troăng, tơrŭm hên lâp plâi tơnêi ƀă mot tơrŭm cheăng kâ lâp plâi tơnêi dêi tơnêi têa.