Tơdroăng tơkêa bro mơ’no liăn cheăng mơjiâng Tơraih tơƀai Quảng Trị châ Ngế pro xiâm hnê ngăn Chin phuh kĭ troăng hơlâ mơ’no liăn cheăng mơjiâng tiô troăng khu tơrŭm cheăng tơnêi têa ngế krê. Tơdroăng tơkêa bro kân lối 265 ha, tâi tâng kơxô̆ liăn mơ’no lối 5.800 rơtal liăn, tơxâng tơdroăng kal vâ xúa troh 5 rơtuh roh tơmối/hơnăm ƀă 25.500 tâ̆n tơmeăm khoăng/hơnăm.

Tiô tối hdrối troh khế 7/2026, Tơdroăng tơkêa bro kô ăm xúa. Xông tơpui a leh pơxiâm po, pôa Lê Thành Long, Ngế pro xiâm phŏ hnê ngăn Chin phuh tối nhên, Tơraih tơƀai Quảng Trị hiăng châ Ngế pro xiâm hnê ngăn Chin phuh pơkâ pêi pro cho 1 tung 30 tơraih tơƀai dêi lâp tơnêi têa châ mơ’no liăn cheăng hdrối hơnăm 2030.

Khu xiâm pơkuâ troăng prôk ƀă rơxế kơtâu ƀă mâu khu xiâm, kơvâ cheăng, tíu cheăng ki tơdjâk pơtối tơmâng, môi tuăn ƀă ai hnoăng cheăng pêi pro teăm tơdrêng mâu mơ-éa ƀă tah lôi mâu tơdroăng pá puât, tơvâ tơvân tung tơdroăng po rơdâ mơjiâng.