Tơbleăng pơxiâm hôp, pôa Trần Thanh Mẫn, Kăn xiâm hnê ngăn Kuô̆k hô̆i  ăm ‘nâi, a rôh hôp mê, Vi ƀan pơkuâ cheăng Kuô̆k hô̆i ăm hnê tối 06 tơdroăng kal, tung mê ai tâi tâng, pôi tá môi tiah a rôh hôp má 7 ƀă tơbleăng tơdroăng hbrâ rôh hôp má 8, Kuô̆k hô̆i hneăng 15 po a khế 10 la ngiâ.

Ki tơxâng vâ tối, Vi ƀan pơkuâ cheăng Kuô̆k hô̆i pơkâ 02 tơdroăng dêi kơvâ liăn ngân, mê cho: Tơdroăng tơ’nôm hbrâ hrê đi đo ‘na liăn ngân tơnêi têa hơnăm 2024 dêi Khu xiâm pơkuâ ngăn lêng, Khu xiâm kŏng an.

Tơdroăng ‘mâi rơnêu pơkâ ‘no liăn mơjiâng pro tơmeăm khoăng tơnêi têa ton hơnăm ing liăn ngân xiâm tơnêi têa pơla hơnăm 2021-2025 dêi Khu xiâm , kơ koan xiâm tơnêi têa ƀă kong pơlê; pro klêi hlá mơ-éa ‘no liăn pêi mâu tơdroăng tơkêa bro tiô mơhno hiăng tâk ki xo, pôe kơdroh, kơdĭng hrê liăn ngân xiâm tơnêi têa hơnăm 2021 ki u ối klêi pêi tơdroăng tŏng gum liăn mung ối hngêi ăm mơngế pêi cheăng dêi Tơdroăng ‘mâi mơnhông ƀă mơnhông cheăng kâ-rêh ối.