Roh hôp kố kô tơkŭm po pro 2 roh. Roh má 1 sap ing hâi kố troh kơxo lơ 13/9; roh má 2 sap ing hâi lơ 23 troh lơ 26/9. A roh hôp kố, Vi ƀan pơkuâ Kuô̆k hô̆i tơpui hên tơdroăng ki kal.

‘Na tơdroăng mơjiâng luât, Vi ƀan pơkuâ Kuô̆k hô̆i tơpui ‘na mâu tơdroăng tơkêa bro Luât: Luât trếo pơkeăng (‘mâi rơnêu); Luât hnoăng mơhá tê tơmeăm ki phá tơ-ê; Luât hnoăng mơhá pêi lo liăn khu tê mơdró (‘mâi rơnêu); Luât ‘mâi rơnêu, tơ’nôm mâu troăng dêi Luât mơđah tơbleăng; Luât pêi cheăng (‘mâi rơnêu); Luât chêh mâu tơdroăng kuăn pơlê; Luât ‘mâi rơnêu, tơ’nôm mâu troăng dêi Luât Ƀaoh hiêm khăm pơlât; Luât Mâu ngế hnê hriâm; Luât ‘mâi rơnêu, tơ’nôm mâu troăng dêi Luât sih quan khu lêng kuăn pơlê Việt Nam; Luât ‘mâi rơnêu, tơ’nôm mâu troăng dêi Luât pêi cheăng séa ngăn dêi Kuô̆k hô̆i ƀă Hô̆i đong kuăn pơlê; Luât pơkuâ ƀă mơ’no liăn cheăng tơnêi têa a khu tê mơdró.