Veăng ƀă xông tơpui a leh pơxiâm po, pôa Nguyễn Trọng Nghĩa, Kăn cheăng tung Khu xiâm kal kí, Kăn pơkuâ pơtâng tối tơdroăng kal tơnêi têa kheanw kơdeăn mâu tơdroăng châ tơƀrê ki Rơ’jíu Việt Nam, mâu Rơ’jíu – Um tơvi kong pơlê, pơlê kong kơdrâm ƀă mâu rơxông kăn ƀô̆, kŏng nhân viên Kơvâ Rơ’jíu Việt Nam châ tơƀrê tung pơla kố nah ƀă rơkâu mâu ngế ki chêh, tơpui pơchuât, khu chêh ai ƀai chêh, ƀai tơpui pơchuât ki má môi châ mot tung Roh Châm má mơ’nui Tơ’noăng chêh hlá tơbeăng, tơpui pơchuât tung rơ’jíu, um tơbi lâp tơnêi têa roh má 16.

Pôa Nguyễn Trọng Nghĩa tối nhên, chêh hlá tơbeăng, tơpui pơchuât tung rơ’jíu, um tơvi cho môi tung mâu pháu hnêa ‘na hiêm mơno ki heăn dêi Đảng, Tơnêi têa; cho kông tơdjêp pơla Đảng, Tơnêi têa ƀă kuăn pơlê, cho hôp tơpui tơno vâ kuăn pơlê veăng séa ngăn, pơkuâ pơlê pơla. Kơvâ chêh hlá tơbeăng, tơpui pơchuât tung rơ’jíu kal hbrâ teăm tơdrêng tơmiêt pêi rơkê tâ tung tơdroăng pơtâng tối tơdroăng kal nhuô̆m pêi tiô tơdroăng nôkố dêi tơdroăng rêh ối pơlê pơla dêi tơdroăng pơhlêh nếo, hbrâ prôk troăng ahdrối ti tăng plĕng ‘na tơdroăng kân, tơdroăng nếo, tơdroăng pá dêi tơnêi têa; pơtâng tối troăng prôk dêi Đảng, troăng hơlâ luât dêi tơnêi têa troh ƀă kơdrâm mâu râ kuăn pơlê.