Tơpui mơgêi rôh hôp, pôa Phạm Minh Chính, Ngế pro xiâm hnê ngăn tơnêi têa phiu ro mâu rơkong tơpui ki tơdrăng, ivá khŏm mơ-eăm, hnoăng cheăng pôu râng ƀă tro khât dêi mâu kăn ‘na rêm tơdroăng cheăng hơ’lêh chêh bro hlá mơ-éa.

Ƀă ivá khŏm mơ-eăm khât, pêi pro kơhnâ, tơƀrê Ngế pro xiâm hnê ngăn tơnêi têa pơkâ thế mâu khu xiâm, pơkuâ cheăng, kong pơlê, mâu ngế cheăng tung Khu hnê mơhno mơdêk hiâm mơno pôu râng, mơdêk ivá dế ai, pơtối, rak ivá rơdêi, tơbleăng pêi pro tơdrêng hlối mâu hnoăng cheăng, troăng hơlâ mơdêk rơdêi hơ’lêh chêh bro hlá mơ-éa ai pơxúa, tơƀrê nhên, tơdâng tơ’mô, kơdroh mơhrê liăn ăm kuăn pơlê ƀă khu mơdró kâ, mơdêk ivá tơxup dêi kế tơmeăm ƀă tơdroăng cheăng kâ, veăng gum mơdêk pêi pro ƀlêi chiâng mâu tơdroăng pơkâ, hnoăng cheăng mơnhông cheăng kâ rêh ối pơlê pơla hơnăm 2024 ƀă mâu hơnăm ki pơtối.