Pơtối kơ-êng ƀă tiâ rơkong kơ-êng a hneăng hôp má 7 dêi Kuô̆k hô̆i, kơxo lơ 5/6, pôa Nguyễn Hồng Diên, Ngế xiâm Khu xiâm pơkuâ Kơmăi kơmok tê mơdró tối nhên mâu xiâm kối kơmăi kơmok tŏng kum tung tơnêi têa tá hâi châ tơdroăng xiâm pơkâ mơ’no cho kơxô̆ liăn ƀă mâu troăng hơlâ mơhnhôk mơ’no liăn cheăng kong têa ê FDI. Tơdrêng amê, Ngế xiâm xuân pêi pro nhên mâu troăng vâ tŏng kum khu tê mơdró tê ngi kong têa ê tung la ngiâ vâ xúa tâi tâng ki pơxúa ing mâu pơkâ tơniăn krê rơxông nếo.

Xông tơpui mơgêi khu mâu tơdroăng ối tung kơvâ kơmăi kơmok tê mơdró, pôa Trần Thanh Mẫn, Kăn xiâm hnê ngăn Kuô̆k hô̆i mơnhên, roh kơ-êng tơkŭm po tung pơla kơdrâm phiu ro, pôu râng hnoăng cheăng.Hiăng ai 40 roh kăn teăng mâ kơ-êng ƀă 6 kăn teăng mâ tơtŭng. Ngế xiâm pơkuâ Khu xiâm kơmăi kơmok tê mơdró hiăng tiâ rơkong kơ-êng tŭm mâu tơdroăng mâu kăn teăng mâ Kuô̆k hô̆i tối.

Ing roh kơ-êng, pơkâ thế Chin phuh, Ngế xiâm pơkuâ Khu xiâm Kơmăi kơmok tê mơdró ƀă mâu Khu xiâm ai tơdjâk pêi pro châ tơƀrê mâu troăng hiăng pơkâ mơ’no, tung mê, pơtối kêi đeăng luât ai tơdjâk troh tê mơdró điê̆n tưh, gâk kring mơngế rôe xúa; mơdêk tơdroăng mơhnhôk tê mơdró, po rơdâ, ai hên kơchơ mơdró lâp plâi tơnêi ƀă hlối mơdêk ki dâi lĕm tơmeăm khoăng.