Po ing hâi lơ 9 troh lơ 14/7, a kong pơlê Thanh Hóa, Tơ’noăng topui pơchuât tung rơ’jíu lâp tơnêi têa cho tơdroăng cheăng dêi kơvâ chêh hlá tơbeăng Việt Nam, châ tơkŭm po tiah hmâ 2 hơnăm môi xôh, vâ châ hlo, ô eăng mâu ngế ki chêh, mâu ƀai chêh ki rơkê dêi mâu ngế ki chêh hlá tơbeăng tung lâp tơnêi têa.

Rôh tơ’noăng chêh hlá tơbeăng lâp tơnêi têa – Hâi mơdĭng dêi mâu ngế chêh hlá tơbeăng ối cho rôh vâ mâu ngế chêh hlá tơbeăng, ngế rah chêh, trâm mâ, hriâm ƀối ing dêi rơpó, mơdêk ki rơkê dêi hnoăng cheăng. Rôh tơ’noăng chêh hlá tơbeăng lâp tơnêi têa má 16 ai tơdroăng ki veăng dêii 81 to tíu pêi cheăng mê cho 63 Rơ’jíu – Um tơvi kong pơlê, pơlê kong kân, mâu tíu pêi cheăng dêi Rơ’jíu Việt Nam, Tíu xiâm mơ’no Rơ’jíu - Um tơvi Khu lêng Kuăn pơlê, Khu xiâm mơ’no um tơvi, rơ’jíu, internet Kŏng an Kuăn pơlê, ƀă 380 ƀai tơ’noăng.

Klêi kơ’nâi rôh tơ’noăng apoăng châ tơkŭm po a kong pơlê Tuyên Quang, Khu châm điêm hiăng rah xo 228 ƀai dêi 81 tíu pêi cheăng châ mot tung rôh tơ’noăng má mơ’nui.