Ngế rơtăm Nguyễn Đức Danh (lâm 12A1, Hngêi trung râ má pái phôh thong Lương Thế Vinh, tơring Kƀang, kong pơlê Gia Lai) cho môi tung 8 ngế kuăn pơlê hơnăm ối nếo, kơhnâ rơkê dêi kong pơlê Gia Lai hơnăm 2023. Ối hriâm tung hngêi trung, o hiăng ai 4 đê tai khoa hok kih thuât pơrá châ kâ pri kân. Tung mê, đê tai xúa AI tung tơdroăng tŏng kum séa ngăn ƀă pơkuâ Hngêi trung châ kâ pri má môi roh tơ’noăng tin hok hơnăm ối nếo kong pơlê Gia Lai roh má XXII-2023, pri má péa roh tơ’noăng tin hok rơxông ối nếo kơpong peăng Tơdế tơnêi têa – Tây Nguyên ƀă pri mơhnhôk lâp tơnêi têa.

Nguyễn Đức Danh xuân cho ngế ki má môi tung tơdroăng hriâm tâp ƀă pêi troăng tơdjâ hiâm mơno Hồ Chí Minh dêi kong pơlê Gia Lai:

“Ƀă hnoăng xuân cho môi ngế cheăng tung khu pơkuâ Đoân Droh rơtăm hngêi trung, o đi đo thăm veăng mâu tơdroăng pêi cheăng. Cho môi ngế hok tro mê á mơnhên tơdroăng hriâm tâp ƀă tơdroăng châ tơƀrê hriâm tâp cho tơdroăng ki kal má môi. Kô châ mâu tơdroăng châ tơƀrê lĕm tung tơdroăng hriâm tâp tơdrêng amê cho kuăn nguăn hok tro rơkê Pôa Hồ cho ki nhên má môi ƀă kơnâ vâ la ngiâ chiâng kuăn pơlê kum mơjiâng tơnêi têa’’.

Xuân hên tơdroăng pói vâ pleăng hnoăng cheăng, nâ Nguyễn Hoài Phương – Kăn pơkuâ hnê ngăn Đoân Droh rơtăm Kŏng san Hồ Chí Minh tơring Chư Păh, kong pơlê Gia Lai hiăng rơtế droh rơtăm tơring thăm mơjiâng thôn pơlê nếo ƀă kum tơdroăng rêh ối pơlê pơla. Tung mê, ki má môi cho troăng kân droh rơtăm ai krâ on tơhrik bâ eăng ƀă camera gâk kring a pơlê Phung, cheăm Ia Mơ Nông. Rơtế ƀă mê cho 5 toăng hngêi tuăn pâ ƀă hên troăng pêi kum tăng cheăng pêi ăm vâi hdrêng kuăn tê mơngế hdroâng kuăn ngo. Nâ Nguyễn Hoài Phương tối ăm ‘nâi:

“Cho môi ngế kơdrâi pro kăn pơkuâ Đoân, á pói vâ tơdroăng thế hriâm tâp tiô Pôa Hồ sap ing mâu tơdroăng ki kŭn, tơ’lêi hlâu má môi. Tung pơla kố nah, á rơtế đoân viên droh rơtăm tơring veăng kêi đeăng lối 550 tơdroăng cheăng, tơmeăm khoăng droh rơtăm, ƀă tâi tâng ki kơnâ lối 8,5 rơtal liăn. Tiô ngin tối mê cho tơdroăng ki tơ’lêi vâ rơxông ối nếo châ hriâm tâp, pơtâp, pleăng hnoăng cheăng ƀă xông kân’’.

Sap hơnăm 2021 troh nôkố, a kong pơlê Gia Lai ai 235 ngế vâi hdrêng châ kheăn kơdeăn cho droh rơtăm pêi tiô rơkong Pôa Hồ. Ngoh Đỗ Đức Thanh – Kăn phŏ pơkuâ Đoân Droh rơtăm Kŏng san Hồ Chí Minh kong pơlê Gia Lai tối ăm ‘nâi, tung mê mâu roh tơ’noăng môi tiah: droh rơtăm pleăng hnoăng cheăng, rơxông ối nếo tơmiât pêi rơkê, rơxông ối nếo djâ troăng ahdrối gâk kring Tơnêi têa, droh rơtăm pơxiâm tăng cheăng pêi ƀă hía hé, hên droh rơtăm hiăng mơhno châ tơdroăng ki tá hiâm mơno pleăng hnoăng cheăng, hiâm mơno djâ troăng ahdrối, mơnhông ivá hơnăm ối nếo tung hriâm tâp, pêi cheăng, mơnhông cheăng kâ – rêh ối pơlê pơla:

“Tơdroăng po rơdâ mâu ngế ki djâ troăng ahdrối, tơdroăng vâ pêi, troăng pêi rơkê cho môi tung mâu tơdroăng cheăng pêi đi đo. Ngin ai môi pơkâ pêi chuyên đê ‘na po rơdâ mâu troăng pêi kố, ki rơhêng vâ tối cho mơdêk pêi pro hriâm tâp ƀă pêi tiô troăng tơdjâ hiâm mơno Hồ Chí Minh. Ing mê, xuân kô mơjiâng tơdroăng ki hriâm a dêi pó mơjiâng chiâng mâu ngế hơnăm ối nếo djâ troăng ahdrối ai pơxúa ăm pơlê pơla”.

Ing tơdroăng pơtâng tối, mơdêk hriâm tâp ƀă pêi tiô troăng tơdjâ, hiâm mơno Hồ Chí Minh ăm rơxông ối nếo tung kong pơlê tung pơla kố nah, Khu pơkuâ hnê ngăn cheăng Đoân Droh rơtăm kong pơlê Gia Lai mơnhên môi troăng pêi vâ mơdêk châ tơƀrê hriâm tâp ƀă pêi tiô troăng tơdjâ Pôa Hồ tung la ngiâ. Tiah hmâ rêm hơnăm mơjiâng pơkâ pêi tiô chuyên đê dêi kong pơlê, tơkŭm po roh hôp kal kí ƀă dó inâi “Pâ troh Pôa – Hiâm mơno pin hleăng lĕm tâ’’ a roh tơbâ hâi kot mâ Pôa.

Pêi pro tơdroăng “Bâ eăng tơdroăng pói vâ rơxông ối nếo Việt Nam’’, tơkŭm po kheăn kơdeăn droh rơtăm rơkê hôm pêi tiô rơkong Pôa Hồ, kheăn kơdeăn droh rơtăm ki kơhnâ rơkê tung mâu kơvâ cheăng. Mơdêk pêi pro roh mơhnhôk ‘’Rêm hâi môi tơdroăng ki lĕm, rêm măng tĭng môi tơdroăng hơ’muăn lĕm’’ tung mâu trang krê, fanpage dêi mâu khu râ Đoân, Hô̆i. Tơkŭm pêi pro Pơkâ pêi dêi Khu pơkuâ hnê ngăn cheăng Đoân droh rơtăm ‘na tơdroăng po rơdâ ngế djâ troăng ahdrối, tơdroăng hơ’muăn ki lĕm tung hriâm tâp ƀă pêi tiô troăng tơdjâ, hiâm mơno Hồ Chí Minh sap ing kố troh hơnăm 2027.